تبلیغات اینترنتیclose
سيّد عظيم شيرواني‌نين اثرلري
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

سيّد عظيم شيرواني چوخ جهتلي شاعير، عاليم و اديب ايدي. بير طرفدن ديني فيقه، رجال، اصول و كلام علملريني ياخشي اوخويوب منيمسه‌ميش و باشقا طرفدن ايكي ادبي فنلر، عروض، قافيه، شعر، منشآت، قصص و تاريخ فنلري ايله دريندن تانيش ايدي. بونلاردان علاوه توركجه، عربجه و فارسجا ايله ياناشي، روس ديليني‌ده بيليردي و او طريق ايله روس و آوروپا ادبياتي ايله ماراقلانيردي. آمما اصلينده، او شعر تاريخيميزين ان آدليم سيمالاريندان بيري و شعريميزين اؤز زمانه‌سينده دؤنوش نؤقطه‌سي ساييليردي. اليميزده اولان اثرلري عموميتله شعر تاريخيميز ايله علاقه‌داردير:

1 . ديوان قصائد توركي

سيّد عظيمين توركجه قصيده‌لري بؤيوك بير اكثريت تشكيل ائدير. اونلارين موضوعلاريني تحميديه، پيغمبر نعتي، حضرت علي مدحي، اؤيود و نصيحتلر، حكمي و عرفاني، اجتماعي و سياسي مفهوملار احتوا ائدير. بونلاردان باشقا گؤزل باهاريه‌لر، تانينميش هم يئرليلر حاققيندا او جومله‌دن مجتهد آقا سيّد علي آقا، شيخ الاسلام ملا احمد سالياني، حاج مجيد افندي و باشقالارينا خيطاب قصيده‌لر يازميشدير. بير نئچه قصيده‌سيده ناصرالدين شاها خيطابدير.

اونون ان گؤزل قصيده‌لريندن بيري يا رسول الله! قصيده‌سيدير. بو قصيده بئله باشلايير:

فدا بو آستانين خاكينا جان يا رسول الله،

كه اهل درده‌دير بو درده درمان، يا رسول الله!

 

قصيده‌نين مقطعي بئله‌دير:

كرم قيل سيّدي قورتار بلاي نفس شوموندان،

دخيليندير بوگون حسّان شيروان، يا رسول الله!

2. ديوان غزليات توركي

سيّد عظيمين توركجه غزللري آلتي يوزدن زياده الده ائديلميشدير. گله‌جك بؤلومده بو حاقدا دانيشاجاغيق.

3. مكتوبات منظوم

سيّد عظيم اؤز دوستلارينا و زمانه‌سي‌نين آدليم انسانلارينا دفعه‌لر منظوم نامه‌لر ايله رجوع ائديبدير. الده ائديلن مكتوبلارين حجمي بير جيلد كيتاب تشكيل ائدير. بو منظوم نامه‌لرين آراسيندا بير نئچه‌سي حسن بيگ زردابي‌يه خيطاب‌دير. اوندان باشقا، محمد جرمي، محمد صفا، اسماعيل قاصير، عبدالله عاصي، محمد تقي قمري، ميرزا رحيم فاني، علي اصغر نورس، فرهاد ميرزا و حتي زمانه‌نين حاكيملرينه خيطاب ادبي- اجتماعي‌ مكتوبلاري واردير.

4. حكايات منظوم

ربيع الاطفال، ربع الاطفال و گولزار باهار آدلاري ايله‌ده تانينان حكايات منظوم كيتابي، اصلينده گنجلره و مكتب يئني يئتمه‌لري ايچون يازيلميشدير. شاعير بورادا اغلب حكايه‌لري اوغلو جعفره خيطاب ائتميشدير. ميثال ايچون:

جعفر! اي ساده‌لوح و پاك ضمير!

بيل كي واردير زماندا چوخ تزوير.

سوره‌ي يوسيف ايچره، مكر زنان،

اوخوسان، اي اوغول اولوبدو بيان . . .

 

بو كيتابين حكايه‌لريني جامع التّمثيل، كليله و دمنه، گولوستان سعدي و باشقا ادبي قايناقلاردان آلميشدير.

5. حكايات منثوره

حكايات منثوره و يا لطائف  كيتابيندادا يوزه ياخين كيچيك لطيفه‌لر و حكايه‌لر يازميشدير. ميثال ايچون:

بير گون بير خان مجليسده دئدي كي هر كيم اؤز عورتيندن راضي ديرسا آياغا دورسون. هامي قالخديلار، آياغا دوردولار، مگر بير شخص كي قالخمادي. خان دئدي:

- اي شخص مگر سن عورتيندن راضي‌سان كي آياغا قالخمادين؟

او جواب وئردي كي:

- يوخ، سنه فدا اولوم، بوگون عورتيم قيچيما بئله دوروبدور كي، قيچيم شيكست اولوبدور، او سببدن قالخماديم!

6 . سيچان و پيشيك

سيّد عظيم، عبيد زاكاني‌نين موش و گربه آدلي اثري اساسيندا بو منظومه‌ني يازميشدير.

سيچان و پيشيك كيتابيني بئله باشلايير:

حمد اولا اول خاليقه صوبح و مسا،

كيم يئتيريب فئيضي جاهانا صفا.

جومله‌ي مخلوقا وئريب جانلار،

حاضير ائديب نعمتِ الوانلار.

هر نه هوادا او كي پرواز ائده‌ر،

پر آچيبان قدرتين ابراز ائده‌ر.

ايكي قاناد ايله اوچان طئيرلر،

يئرده گزه‌ن دابّه‌لر، غئيرلر،

ايكي آياق ياكي اولا دؤرد آياق،

باده‌ي قدرتدن ايچيبدير اياق . . .

. . .

نقل ائله‌ييم من سنه بير داستان،

فارسي ايله نظم ائله‌ييب باستان!

توركي ايله من اونو تحرير ائديم،

كؤنلونو شاد ائت، سنه تقرير ائديم.

بيرجه قولاق وئر بئله داوايا سن،

ائيله نظر شورش و غوغايا سن.

بيل كي نه سولطان نه خانين جنگيدير،

بير پيشيك ايله سيچانين جنگيدير! . . .

 

7.  هجويه‌لر

كئچميشده شاعيرلر آراسيندا هجو و هزل يازماق عادي بير حالا چئوريلميشدي.

البته بو هجو و هزللر بؤيوك شاعيرلر طرفيندن يازيلاندا سياسي - اجتماعي معنا آلير و طنزه چئوريليردي. يالنيز ساده‌جه گولوش و يا بيريسيني تحقير ائتمه يوخ، بلكه اويانما و انتباه آماجي گؤدوردو. هر طنز پارچاسي، بير تازيانه كيمي بير طرفدن ظاليملري تنبيه ائتمه و ايكينجي طرفدن مظلوملاري اويالتما ايچون يازيليردي. سيّد عظيمين لاييق و خلف شاگيردي ميرزا علي اكبر صابر، آذربايجان شعرينده طنز مئيدانلاري‌نين قهرماني، اؤز بيليك و باجاريغيني سيّد عظيمدن آلميشدير.

سيّد عظيمين هجو- طنزلري ايسه بعضا ايكي دوست آراسيندا مزاح ماهيتي داشيير و بعضاده بيگلر و فرمان وئره‌نلرين حاققيندا يازيلميشدي. اونون هجولري آراسيندا شيروان بيگلري حاققيندا، شاماخي حاكيملري حاققيندا، بابيلر و بعضي رياكار روحاني‌نومالار حاققيندا يازيلميشدير. او، بو هجولرده رشوت خورلوق و روس دولتي اورقانلاريندا باش وئرن ظولم، فساد و زوراكيليقدان سؤز آچير:

فُقرالار يانيبان ظولم اودونا اولدو كباب،

بير طرفدن ائله‌دي زلزله شيرواني خراب،

بير طرفدن‌ده بولار عالمي ويران ائله‌دي.

نه پريستاو، نه كؤمكچي، نه كوارتال، نه قازاخ،

هاميسي قورد كيمي سويماقليغا خلقي كي قوچاق . . .

 بورادا اونون شعرلري كسگين استهزا و آجي گولوشلر ايله دولودور. ائله بونا گؤره‌ده اونون عصرينده بعضي گئري قالميش و ساتقين شاعيرلرده سيّد عظيمي دفعه‌لر ذم و هجو ائتميشلر. سيّد عظيمين هجوياتي مستقل بير كيتاب كيمي يوخ، بلكه ديوانلاري‌نين مختليف چاپلارينا سالينميشدير.

8 . فارس ديليندن ترجومه‌لر

فارسجادان، شيرازلي سعدي‌نين گولوستان و بوستان اثرلريندن بير چوخ حكايه‌لر ترجومه ائتميشدير. ميثال ايچون:

بير شخص لوقمان حكيمدن سوروشدو:

- حكمتي كيمدن اؤيره‌ندين؟

دئدي كي:

- نابينالاردان. چونكي كورلار بير يئري گؤرمسه‌لر، يعني يوخلاماسالار قدم قويمازلار!

ها بئله زينت المجالس كيتابيندان بير نئچه تربيوي حكايه ديليميزه چئويرميشدير.

9. پريشان نامه

بو آد ايله اوغلونا نصيحتلر يازميشدير. و قاآني‌نين پريشان آدلي كيتابينا بنزه‌تميشدير. بو كيتابين 1291 ش. (1912 م.) ايلينده تهراندا  داش باسما اصوليله نشر ائديلمه‌گيني خبر وئره‌نلر واردير.[1]

10. كليات فارسي

دئدگيميز كيمي سيّد عظيمين عموميتله قصيده يازماغا چوخ مئيلي وار ايميش. اونون هم توركجه و هم فارسجا قصيده‌لري‌نين حجمي او قده‌ر چوخدور كي هر بيريني بير قصيده‌لر ديواني آدلانديرماق اولار. فارسجا ديواني اون مين بئيته ياخيندير و دوستو حبيب صادق تبريزي طرفيندن حاضيرلانيبدير و كليات فارسي آدلانديريلميشدير. كليات فارسي‌يه آشاغيداكي بؤلوملر داخيلدير:

1-     قصيده‌لر.

2-     عزادارليق غزللري.

3-     عاشيقانه و عارفانه غزللر.

4-     ترجيع‌بند، تركيب‌بند، مخمّس، مسدّس، مثنوي، رباعي و غيره بو كلياتين ياريسيني قصيده‌لر تشكيل ائدير.

 

11. قصص الانبياء (فارسجادان ترجومه‌)

نثر و نظم ايله يازيلميشدير. نشر اولماديغي ايچون حله‌ليك بيرزاد دئيه بيلميريك.

12. غزوات حضرت علي (ع)

بو اثرده نشر اولماميشدير.

13. مقتل

كربلا حادثه‌سي ايله علاقه‌دار يازيلميش، قوشا بئيت، نوحه و افراددان عيبارتدير. نشر اولماميشدير.

14.  شيروان نامه

شيروان تاريخي و مدنيتي حاققيندا اولماليدير. نشر اولماميشدير.

15. روس ديليندن ترجومه‌لر

روس ديلينده يازيلان ادبي اثرلر ايله تانيش اولان سيّد عظيم، روس شاعري كريلوف دان نئچه نصيحت آميز شعر ترجومه ائتميشدير. هابئله پوشكين‌نين بير نئچه منظومه‌سيني توركجه‌ميزه قازانديرميشدير.

 



[1] سيّد عظيم شيرواني اثرلري، باكي، 1967، ج 1، ص 8- 10 و ج 2، ص 615.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی