تبلیغات اینترنتیclose
سید عظیم شیروانی ديواني‌نين بير پارا مضمونلاري- 1
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

1. تحميديه و نعت

كلاسيك شاعيرلريميز اؤز ديوانلاريني تحميديه و نعت ايله باشلارميشلار. تحميديه عموميتله ايلك قصيده و ايلك غزل اولور. بورادا توحيد، ياراديليش، افلاك، دنيا و عقبي مسأله‌لرينه فلسفي- عرفاني گؤروشله باخيلير. فضولي‌نين ان مشهور نعتي قصيده‌لر آراسيندا سو قصيده‌سي:

ساچما اي گؤز! اشكدن كؤنلومده‌كي اودلارا سو،

كيم بو دنلي توتوشان اودلارا قيلماز چاراسو.

 

و غزللر آراسيندا آشاغيداكي غزلدير:

اي اولوب معراج، برهان علوّ شان سنا،

يئره ائنميش گؤيدن استقبال ائديب فرقان سنا.

 

شاعير قصيده‌لريندن علاوه، غزللرينده‌ده تحميديه و نعته يئر وئرير.

سيّد عظيم غزللريني، تورك غزلچيليگنده نوايي‌دن بويانا بير عادته چئوريلن عارفانه بير تحميديه ايله باشلايير كي عموميتله مطلع عربجه دير و غزل متنينده مئي دن سؤز گئدير.

نوايي‌نين ايلك تحميديه‌سي‌نين مطلعي:

اشرقت من عكس شمس الكأس انوار الهدي،

يار، عكسين مئيده گؤرديپ، جامدين چيقتي صدا.

 

فضولي‌نين ايلك تحميديه‌سي‌نين مطلعي:

قَد انار العشق للعشّاق منهاج الهدا،

سالك راه طريقت عشقه ائيله‌ر اقتدا.

 

سيّد عظيمين ايلك تحميديه‌سي‌نين مطلعي:

قَد تَجلّي مِنْ شُعاعِ الكأسِ اَنوارُ البِها،

تِلكَ فَضلُ الله بَل يَهدي لِنورِ مَن يَشا.

 

ايلك تحميديه غزليندن علاوه، سيّد عظيم وارليق بيرليگي (= وحدت وجود) اينانجي اساسيندا الف قافيه‌سينده غزل تاريخيميزين بير نئچه ان گؤزل تحميديه‌لريني ديوانينا داخيل ائدير. آشاغيدا گؤستره‌جگيم بو ايكي تحميديه او قده‌ر معنالي، خوش مضمون و لطيف دوشوب كي بوتون تورك و فارس غزل ديوانلاريندا اونلارلا باش باشا گئدن نظيره آز تاپماق اولار:

اگر چه جمله‌ي عالمده يوخ نيشانه سنا،

ولي ساليبدي كؤنول مئهر غائبانه سنا . . . [1]

 

اي نور سماوات و زمين! گر چه نيهانسان،

اما نظر عارف و دانادا عيانسان . . . [2]

 

سيّد عظيم شيرواني‌نين غزللري آراسيندا اولان نعتلر، اسلام پيغمبري‌نين فضيلتلري‌نين تعريفينده و عارفانه دويغولار ايله دولودور. هر بير غزلي بير فصل كيتاب كيمي، پيغمبرين قرآن مجيدده گلن اوصافيني سايماقدادير.

ميثال ايچون:

اي تارِ سر زولفون، واللّيل اذا يغشي،

والشّمس يوزون وصفين ذرّاتا، قليب انشا.

 

مطلعي ايله باشلايان غزلين هر بئيتينده بير قرآني توصيف يئرلشير:

تا نيقاب اولدو سنين روخساريوا زولف سياه،

آفتاب اولدو نيهان، حتي توارث بالحجاب.

 

اونون التجا ائتديگي مقام ايسه، يئنه‌ده پيغمبردير و اونو عشق مقاميندا اؤزونه حبيب سايير:

عشقه دوشدوم، كسدي مندن اولفتين احبابلار،

يا حبيب الله! دخيلم، سيّده سنسن حبيب.

 

او، حتي پيغمبر نعتيني، و پيغمبره اولا عشقي، قرآنين معناسي حساب ائدير:

سيّدا سن گئت اوخو صيدق ايله قرآن كي منيم،

از بريم ميم محمد (ص) دي، شعاريم صلوات!

 

شاعير اسلام پيغمبريني بوتون پيغمبرلردن اوستون سايير و باشقا پيغمبرلرين اهميتيني اونون وجودوندا بيلير:

رُسل سابقه‌سندن يئتيشيب عزّ و شرف،

نئجه كي سكّه ايله سيم بولور قدر رواج.

 

2.  شراب

سيّد عظيم معنوي شراب و حقيقت مئييني وجودون كيمياسي و اينانج لهولري‌نين سيلگيسي حساب ائدير و دئيير:

سيّد! تغافل ائيلمه اكسير باده‌دن،

مسّ وجودا لازيم اولوبدور بو كيميا.

 

و يا:

حقيقت عالمينه قويمادين قدم، واعيظ!

بو باده‌دن اولا تا رفع اشتباه سنا.

 

شعرلري‌نين ظاهيري معناسي شراب ايچمه و مئيخانه‌لر گوشه‌سينده اوتورما تبليغي‌دير. ولاكين بو ظاهيري معنالارا اويانلاري قيناياراق دئيير:

رموز شعريمين درك ائتمه‌ميش معناسيني، سيّد!

گئديب مئيخانه‌لرده لاابالي مئيگوسار اولما.

 

و بئله‌ليكله اوخوجونو اونون سؤزلري‌نين بحرينه جومماغا و معناني ادراك ائتمگه چاغيراراق، عرفان عالمينه قدم باسانلاري وحدت شرابي ايله كئفلنمگه دعوت ائدير.

شاعير حتي ايلك تحميديه غزلينده‌ده شرابدان سؤز ائدير:

 

 

مئي ظهورو اولدو ساغردن عيان عالملره،

كور اولما، چئشمينه وئر دؤر ساغردن ضيا.

غولغول مينا، صداي حقّي ائيلر آشيكار،

دعوت حقدير، بوگون آفاقي توتموش بو صدا.

 

اصلينده عرفاندا شراب، حال معناسيندادير. ابن عربي دئيير:

«شراب ايچمه حاللار علمي (علم الحال) دير. اونو ايچنده نشئه و لذت مئيدانا گلر».[3]

 

3. عاليملره حؤرمت

سيّد عظيم شيرواني حقيقي روحاني و عاليملره حؤرمت بسله‌ين بير شاعيردير. ميثال ايچون اوغلو مير جعفره نصحيت اولاراق، بير يئرده دئيير:

اي اوغول! عاليم اولسا ربّاني،

سن اونون ائت درينده درباني.

من اؤزوم كي زمانه سروري‌يم،

علمانين كمينه چاكري‌يم.

نئجه كيم واردي فاضيل شيروان،

اول بهين زاده‌ي شه‌ مردان.

منبع علم و حلم و نور جلي،

معدن فضل و بذل: سيّد علي،

اعلم و افضل قبائيلدير،

مهبط جمله‌ي فضائيلدير.

يوخدو ذاتيندا بوي رنگ و ريا،

غئيرلر لفظدير، اودور معنا . . .

 

و يا باشقا بير يئرده يئنه‌ده اوغلونا خيطاب دئيير:

جعفر! اي نور ديده‌ي سيّد!

قونچه‌ي نورسيده‌ي سيّد!

علما حققيني رعايت قيل،

اهل علمه هميشه حؤرمت قيل.

علمسيز آدمي خداي جليل،

دئدي: اَنعام بَل اضلّ سَبيل.[4]

بابا ميز آدم اول صفي الله،

علم اسمايا اولدو چون آگاه،

اونا يكسر ملائيك ائتدي سجود،

سجده‌سين فرض ائيله‌دي معبود.

علمدن اولدو حضرت لقمان،

حكمت ايله سرآمد دؤران.

علم بير نور، جهل ظلمتدير،

جهل دوزخدير، علم جنّتدير.

علما اولماسا جهاندا يقين،

اولاجاق پايمال شرع مبين.

علما وارث شريعتدير،

فقها باعث  هيدايتدير.

 

هابئله علم و عاليمه حؤرمت ائتمگي توصيه ائتمكله برابر، اوغلونو اؤز معلم و اوستادلاريني سئومگه چاغيرير و دئيير:

دئمه بو كافر، اول مسلماندير،

هر كيمين علمي وار، او انساندير.

سنه هر كيمسه علم ائده‌ر تعليم،

اونا واجيبدي ائيله‌مك تعظيم.

هاردا گؤرسن اونا سلام ائيله،

باش اگيب، قول تك احترام ائيله.

بيل كي اوستادين،‌ اي رشيد پسر!

سنه روحانيتده اولدو پدر.

پدرين بير منم، بير اوستادين،

جهد قيل ياخشي چيخماغا آدين . . .

ائيله اوستادينا هميشه دوعا،

مغفرت قيل طلب خدادان اونا . . .

 

4. عاغيلچيليق

عاغيلچيليق و يا عقلانيت، سيّد عظيمين فلسفي دوشونوجه‌سي‌نين ان باشدا گئدن مضمون و شيوه‌سيدير. اونون خورافات و جهالت ايله مبارزه‌لري‌ده همين عاغيلچيليغا وئرديگي اؤنم ايچوندور. اوغلونا خيطاب يازديغي اؤيودنامه‌نين بير يئرينده دئيير:

يئتيبن عاغلا، سرفراز اولدون،

داهي مندن كي بي‌نياز اولدون.

عاغل پئيغمبرين قيليب رهبر،

اؤيره‌ن آداب مذهب جعفر.

دئميرم: من گئدن طريق ايله گئت،

عاغلي توت، اول گؤزل رفيق ايله گئت.

سنه بورهان دئين طريق پدر،

گؤر نه يول گئتدي زاده‌ي آزر!

 

5. تجلّي

تجلّي مسأله‌سي عرفاندا گئنيش بحث اولونان بير موضوعدور. قرآندا موسايا طور سينادا حقّين تجلّي‌سيندن سؤز گئدير، ائله تجلّي كي موساني مدهوش ائدير و صعق حالينا گتيرير.

بو اولايين تفسيرينده شيخ محمود شبستري دئيير:

تجلّي گر رسد بر كوه هستي،

شود چون خاك ره، هستي ز پستي.

به نزد آنكه چشمش بر تجلي است،

همه عالم كتاب حق تعالي است.

 

 

از او هر عالمي چون سورتي خاص،

يكي زو فاتحه آن ديگر اخلاص.[5]

 

مولوي دئيير:

كوه طور اندر تجلّي حلق يافت،

تا كه مِي نوشيد و مي را بر نتافت.

 

چون تجلّي كرد اوصاف قديم،

پس بسوزد وصف حادث را گليم.[6]

 

 

حافيظ دئيير:

در ازل پرتو حسنت ز تجلّي دم زد،

عشق پيدا شد و آتش به همه عالم زد.

 

روي نگار در نظرم جلوه مي‌نمود،

از دور بوسه بر رخ مهتاب مي‌زدم.[7]

 

فروغي بسطامي دئيير:

با صدهزار جلوه برون آمدي كه من،

با صدهزار ديده تماشا كنم تو را.

 

يار اگر جلوه كند دادن جان اين همه نيست،

عشق اگر خيمه زند ملك جهان اين همه نيست.[8]

 

سيّد عظيم ايسه دفعه‌لر بو مضمونو اؤز غزللرينده ايشلنميشدير. او جمله‌دن:

 

چون خاكا تجلّي ائله‌دي خاليق جبّار،

اؤز صورتيني خاك سيه‌دن ائديب اظهار . . .

 

باشليقلي غزلينه اشاره ائتمك اولار. بو غزلين سون بئيتي بئله‌دير:

گر ائتمز ايدين عارض دلداردا تجلّي،

سيّد بو قده‌ر اولماز ايدي يارا طلبكار.

 

و عموميتله غزلين هر 8 بئيتي، بير بوتون اولاراق بو معناني تعقيب ائدير.

و يا:

رَبِّ اَرني سؤيله‌ديم، ساقي منه قيلدي عيتاب،

ناگهان قيلدي تجلّي طور ساغردن شراب.

 

سيّدا اولدو تجلّي طورِ وحدتدن عيان،

عالمِ جاني منوّر ائيله‌ين انوارا باخ!

 

 

تجلّي سؤزو سؤزلوكلرده بير شئيين آچيلماسي و اورتايا چيخماسي دئمكدير. بير شئي اورتايا چيخديغيندا تجلّي الشي‌ء دئييلير. شؤهرتي سببي ايله تانينان مشهور كيمسه‌يه ابن جلا دئيه‌رلر.[9] قرآن مجيدده‌ده همين معنادا ايشله‌نير:

وَالنَّهَارِ إِذَا تَجَلَّى.[10]

دئديگيميز كيمي بو يئرده آللاهين داغا تجلّي‌سيندن سؤز گئدير:

فَلَمَّا تَجَلَّى رَبُّهُ لِلْجَبَلِ جَعَلَهُ دَكًّا وَخَرَّ موسَى صَعِقًا.[11]

انساندا ايلاهي تجلّي، ايلاهي خيطاب كيمي‌دير. شاعيرلريميز عموميتله ابن عربي مفكوره‌لريندن آلديقلاري تجلي مسأله‌سيني وحدت وجود نظريه‌سي أوزه‌رينه بير اساس كيمي آلميشلاردير و عرفاني دوشونجه‌لريني يالنيز تجلي نظريه‌سي ايله تفسير ائتميشلر.



[1] همين كيتاب، غزل 4.

[2] همين كيتاب، غزل 381.

[3] فتوحات المكّيه، 544/ 11.

[4] فرقان/ 46.

[5] گلشن راز شبستري به روايت شيخ الوان ولي شيرازي، تصحيح و تدوين حسين محمدزاده صديق، تهران،  1381، ص128.

[6] مثنوي مولوي، به اهتمام توفيق سبحاني، روزنه، تهران، 1378، ص 306 و 357.

[7] ديوان حافظ، مقدمه حسين الهي قمشه‌اي، خط غلامحسين اميرخاني، انجمن خوشنويسان- سروش، تهران، 1374، ص182 و 349.

[8] ديوان فروغي بسطامي، گردآوري حميدرضا قليچ‌خاني، روزنه، تهران، 1376، ص 65 و 115.

[9] معجم.

[10] آچيلديغي زامان، او گوندوزه آند اولسون! (ليل/ 2)

[11] ربّي داغا تجلّي ائتدي و پارام پارچا ائتدي و موسادا باييلدي. (اعراف/ 143)

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی