تبلیغات اینترنتیclose
سید عظیم شیروانی ديواني‌نين بير پارا مضمونلاري- 2
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

6 . وارليق بيرليگي (وحدت وجود)

وحدت وجود دوشونجه‌سيني‌ده شاعيرلريميز ابن عربي‌دن آلميشلار او دئيير:

«وارليقدا آللاهدان باشقا بير شئي يوخدور. حقيقت مشاهده‌ده چوخالسادا، وارليقدا بيردير».

وارليق بيرليگي (= وحدت وجود) دوشونجه‌سي‌نين ان يوكسك ذروه‌سي اونون:

اي نور سماوات و زمين، گر چه نهانسان،

آمما نظر عارف و دانادا عيانسان!

 

مطلعلي غزلينده جانلانير. و يا آردينجا گلن بو غزل:

عيان گؤزله باخان شخصه، نهانسان،

نهان گؤزله باخان ذاتا عيانسان!

 

ابن عربي‌نين بو سؤزلرينه:

«بوتون موجودلار قدرت گونشي‌نين نورلاريندان بير نوردور. گونش قارشيسيندا گونش ايشيغي، اونونلا برابر اولان دگيل، اصلينده بير شمعدير».[1]

استناد ائدرك دوام ائدير:

دئسم پنهانسان، هر يان عيانسان،

دئسم كي من عيانسان، يوخ، نهانسان.

منوّر ائتميسن جومله جاهاني،

مگر سن آفتاب آسيمانسان؟

اؤزون هم راهسان، هم راهزنسن،

اؤزون هم دوزدسن، هم پاسيبانسان.

آديندير ضارّ و نافع، اي نيگاريم!

گهي عشّاقا سودو گه زيانسان.

سنينله‌دير خزانيم هم باهاريم،

ولي سن نه باهار و نه خزانسان.

يئله وئردين شميم تار زولفون،

نسيمي ائيله‌دين،‌ عنبر فيشانسان.

سن اولدون سيّدين نوطقونده ظاهير،

عيان اولدون كي: سن گنج نهانسان!

 

سيّد عظيم فنانين عرفاني معناسيني ياخشي باشا دوشور و دفعه‌لر دئيير كي اوره‌گينده اولان سؤز الفاظ چرچيوه‌سينه سيغمايير. بير فلسفي- عرفاني دوشونجه اساسيندا يازير:

سيّدا عالم صورت اگر اولسايدي فنا،

لفظلر اولماز ايدي دهرده معنايا قفس.

 

فنا، عرفاندا پيس صيفتلرين انساندان گئتمه‌سي، بقا ايسه ياخشي خيصلتلرين انساندا قالماسي دئمكدير. ابن عربي دئيير:

«آرديندان فنانين گلديگي بقايا اعتماد ائديلمز، بقايا يول آچمايان فنايا اعتماد ائديلمز. بقا جوهرين اؤزه‌لليگي و فنا عرضين اؤزه‌لليگي‌دير».[2]

كؤنول بيناسيني ييخدي سيرشك اشك تريم،

غمينده سئيل فنايا گئدير بو خانه، هاراي!

 

فقر و فنايا طاليب اولان دؤلت ايستمز،

بو كيمياني حاصيل ائده‌ن بي‌نياز اولور.

 

وجودوم فاني اولدو حسرت تنگ دهانيندان،

بو دردي كيمسه‌يه فاش ائتمه‌ديم، سيرر نهاندير بو.

 

7.  فخريه و اؤيونمه

شاعيرليكده و سؤز اوستادليغيندا يئرلي و حقلي اولاراق فخر و مباهات ائتمه‌ده، شيروانين ايكي شاعيري: خاقاني و سيّد عظيم قاباقجيل سؤز اوستادلاري حساب اولورلار. خاقاني دئيير:

شاعر مفلق منم، خوان معاني مراست،

ريزه‌خور خوان من، عنصري و رودكي.

 

بو، اونا گؤره‌دير كي خاقاني، عنصري و رودكي كيمي يالتاق شاعيرلر قارشيسيندا اؤزونو فضيلتلي سايير. چونكي هئچ زامان كيمسه‌ني مدح ائتمه‌ين حكيم خاقاني، دوغرودان‌دا آديني يالتاق شاعيرلر سيراسيندا چكمگي عئيب بيلير. او،‌ دفعه‌لر بو يالتاقلاري معرفي ائدرك پيسله‌ميشدير:

شنيدم كه از نقره زد ديگدان،

ز زر ساخت آلات خوان عنصري.

 

و اؤزونه خيطاب دئميشدير:

خاقانيا ز خدمت شاهان كران طلب،

تا از ميان موج سياست برون شوي.

 

سيّد عظيم‌ده بونا بنزه‌ر اؤيونمه‌لر و فخريه‌لر يازير. بير يئرده اؤزونو امير عليشير نوايي و حكيم ملا محمد فضولي ايله مقايسه ائده‌رك، زمانه‌سينده اؤزونو اونلارا بنزه‌ر و تايسيز اديب حساب ائدير:

. . . ائيلمز فرزين نوايي‌ني فلك، روخ گوستريب،

تا اونو فرمانبر شاه خوراسان ائيلمز.

اسب كاما فيل چرخ ائتمز فضولي‌ني سوار،

تا پياده دشت غمده مات و حئيران ائيلمز.

غم بساطين ختم ائديبدير دؤر، سيّد آدينا،

كيم نظيرين دهرده هرگيز نومايان ائيلمز.

 

8.  مسجيد

سيّد عظيم مسجيدي مقدس سايير و اوراني عشق اوجاغي حساب ائديرو رياكارليق و فيريلداقچيليغي، مسجيد شأنينده بيلمير و مسجيدده رياكارليق ائدنلري شدّتله قينايير و اونلارين ايشلريني كيشيليكدن اوزاق سايير و دئيير:

مسجيدده حصيري ائلمه آلت تزوير،

مردانه قدح توت، بو ريادان داخي عار ائت!

 

9. فلسفي دوشونجه‌لر

سيّد عظيمين فلسفي دوشونجه‌لري، درين و حيات وئريجي‌دير. او، فلسفي‌ني خرافات و جهالت قارشيسيندا قويور. اگر ظاهرپرستلري تنقيد و افشاء ائديرسه، اونلارين فلسفه‌دن اوزاق اولمالارينا گؤره‌دير. آچيق دانيشساق، دئمه‌لييك كي شاعير، بوتون ديندارلاري، ديني- فلسفي دوشونجه‌يه چاغيرير:

اماما اختيارين وئرمه، هرگيز اويما تكبيره،

اونون تك فاعل مختارسان، بي‌اختيار اولما.

 

جوهر و عرض كيمي فلسفي اصطلاحلاري دفعه‌لر غزللرينده ايشله‌دن سيّد عظيم:

شراب ناب بير جوهردي، بو عالم عرض، سيّد!

منيم آيريلماغا اول جوهر تردن علاجيم يوخ!

 

اوخوجونو قشري‌ليكدن اوزاقلاشديرير.

جوهر، عرض، مالاكلام، نقطه‌ي موهوم، فاعل، اختيار، مختار، وحدت و كثرت كيمي فلسفي اصطلاحلاري يئر- يئر اونون غزللرينده گؤرمك اولار.

 

10. مداحليق

سيّد عظيم مداحليق و يالتاقليق كيمي صيفتلرين عليهينه‌دير. حتي فارس شعري‌نين يالتاقليق دولو بئيتلريني، چئويريب، اؤز معشوقونا خيطاب ائدرك اونلاري عشق مقامينا لاييق ائدير. مثلاً فارس شعرينده بير يالتاق شاعير، شاه ايله ملاقات قرارينا بئواخت يئتيشديگي ايچون اونا خيطاب دئميشدير:

سحر آمدم به كويت، به شكار رفته بودي،

تو كه سگ نبرده  بودي، به چه كار رفته بودي؟!

 

سيّد عظيم همين بئيتين مضمونونو توركجه‌ميزده معشوقا خيطاب ايشله‌دير و دئيير:

گئديب شيكارا بوگون اول غزال مشكين مو،

آپارماييب ايتيني بيلميرم نه كارا گئديب!

 

قصيده‌لرينده گرچه زمانه‌سي‌نين دؤلت آداملاري و تاجيرلره خيطاب بعضي تعريفلر گؤرونور‌، لاكين بو تعريفلر هيچده مداحليق ماهيتي داشيمير، بلكه اونلاري بر خئير عمله سوق وئرمه و يا فضيلتلريني اؤيمه ايچون قلمه آلينميشدير.



[1] اجوبه، ص 6.

[2] فتوحات، 515/ 2.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی