تبلیغات اینترنتیclose
ديل و ادبي اسلوبو
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

موضوع : ديل و ادبي اسلوبو, | بازدید : 537

1. ديل ساده‌ليگي

سيّد عظيمين غزللري‌نين ديلي او قده‌ر ساده و اويناقدير كي، بير دفعه اوخوماق ايله ياددا قالير و ديلده دولانير. بئله غزللري ائل نعمه‌لرينه چوخ ياخين بير شيوه‌ده يازيلميشدير:

دولانيم باشينا، اي نازليجا ياريم! بري باخ!

عيشوه‌لي، غمزه‌لي، چم - خملي نيگاريم، بري باخ!

عيشوه آغاز قيليب، صبريمي تاراج ائتمه،

گئتدي دلدن داخي آرام و قراريم، بري باخ!

. . . جان نيثار ائتمگه آماده‌دي سيّد گؤزه‌ليم،

گر دئسن لوطف ايله: اي عاشيق زاريم! بري باخ!

 

بعضي يئرلرده كي چنين فلسفي و فيقهي اصطلاحلاري ايشلتمگه مجبور اولور، اؤزو قصداً بو مسأله‌يه اشاره ائديب و داهادا ساده يازماغي بير توصيه كيمي اوخوجويا بيلديرير. ميثال ايچون آغير ديلده يازديغي بير غزلين سونوندا دئيير:

سيّد! غزلده لفظ غليظ ائتمه مندرج،

كيم كشفينه ضرورت اولا كنز يا صحاح!

 غزلده بئيتلرين زنجير حلقه‌لري كيمي بيري- بيرينه باغليليغي و معنا دوامليليغي و غزلين بير بوتون تشكيل ائتديگي، بوتون تورك دونياسيندا ديوان يارادان شاعيرلرده و هابئله فارسجا ديوانلاردا آز گؤرونور عموميتله هر بئيتين اؤزونه خاص معناسي اولور. سيّد عظيمين غزللري ايسه آخيجي ديل ايله معنا بوتونلوگو تشكيل ائدير:

قصد جان ائيلر، او فتّان گؤزلرين بيداددير،

بير كبوتر قصدينه گويا ايكي صيّاددير.

 

و يا تجلّي مضمونوندا يازديغي:

چون خاكا تجلّي ائله‌دي خاليق جبار،

اؤز صورتيني خاك سيه‌دن ائديب اظهار. . .

 باشليقي غزل بير بوتون اولاراق يازيلميشدير. بونا گؤره نظره گلير كي هر غزلينه بير آد وئرمك اولار. ميثال ايچون همين غزلين آديني تجلّي قويماق اولار.

 

2.  شعرلري‌نين اؤلچولري

سيّد عظيم، غزللرينده عروض بحرلريندن رمل، هزج، مضارع، مجتثّ، منسرخ بحرلريندن داها چوخ استفاده ائتميشدير. غزللري‌نين چوخو، رمل بحري‌نين:

فاعلاتن، فاعلاتن، فاعلاتن، فاعلن.

U . U U   U . U U   U . U U   U . U

 

شكلينده يازيلميشدير:

گئجه گؤردوم سني، اي آفت دؤوران، يوخودا،

كي ائله‌ردين منه يوز لوطف فراوان، يوخودا.

 

ايكينجي درجه‌ده هزج بحري‌نين:

مفاعيلن، مفاعيلن، مفاعيلن، مفاعيلن.

       . U U U   . U U U   . U U U   . U U U 

 

  شكليندن يارارلانير:

كؤنول! تا وار الينده جام مئي، سبحه شمار اولما،

رياي خلقدير، بالله ناماز اهلينه يار اولما!

 

او، منسرخ بحري‌نين:

مفتعلن فاعلن مفتعلن فاعلن.

U . . U   U . U   U . . U   U . U

 

شكليندن‌ده استيفاده ائتميشدير:

 

گؤر كي توتوبدور قلم يئر لب جاناندا،

سانكي بيتيبدير يئنه نئي شكرستاندا.

 

3.  ايشلتديگي بديع صنايعي

سيّد عظيم شيرواني‌نين شعر فنّينده بير رساله يازماسي دا مشهوردور. اونون شعرينده تشبيه، جناس، استعاره، مراعات نظير، لفّ و نشر و غيره كيمي بديع علمي‌نين مختليف فنلرينه تئز- تئز راست گلمك اولار.

اونون شعرينده ايشلنن بديع و ادبي فنلردن آشاغيدا نمونه‌لر وئريريك:

پري گؤرموش كيمي رنگيم پريده، عاغليم آزميشدير،

بوگون كيم اول پري شأنيم، ليباس پرنيان گئيميش.

 

بير عهديوه سن ائتمه‌دين اي بي‌وفا، وفا،

قيلدي فراغين ايله دل بي‌نوا، نوا. 

 

سيّد يئتيردي آخر اؤزون خوم آياغينا،

باشيندا شورو نشئه‌سي، الده اياغي وار.

 

گر بير اياق ايله توتا لوطف ائيله‌ييب اليم،

جانيم فدادي ساقي بزمين آياغ‌ـينا.

 

خط قارا، كاكيل قارا، موژگان و گيسولار قارا،

دلبريم بونجا سواد ايله يئنه بيلمز سواد.

 

مني يانديردين آخر آتش هيجرانا، يان دوردون،

دئدين:«يان نار عشقه، كاتشه پروانه صبر ائيله‌ر».

 

حصيري آلت تزوير ائديب اگلشمه مسجيدده،

گل! آللاهي سئوه‌رسن، زاهيدا! سن بو ريادان گئچ!

 

ماشاء الله بو گؤزل كيمدي كي شيروانا گليب،

لبيني مرده‌ي صد ساله گؤروب جانا گليب.

 

مطلعلي غزلين بئيتلري‌نين ايلك حرفلري (محمود) سؤزونو دوزه‌لدير. اؤزوده دئيير:

دئمه‌رم آديني من، باخ سر هر بئيته، بوگون،

بيليسن سيّد اؤزون كيمدي كي شيروانا گليب.

 

 

شطرنج فنّيني ياخشي بيلن شاعير، بو اصطلاحلاري‌دا شعرينده ايشله‌دير:

او شاه فراغي منه روخ وئريبدي مات اولدوم،

وزير عقل دوشوب درده، اول سواره گئديب.

 

هابئله بير غزلينده‌ده نرد اويونون اصطلاحلاريني ييغيب نظم ائديبدير:

شش جهت‌ده طاس بختيم آتمادي بير پنج و شش،

چارسودان غم منه أوز وئردي شام و بامداد.

 

4.  آتالار سؤزو

سيّد عظيم شعرلرينده خلقين جانلي ديلينه اعتنا ائدير، ديليميزين ساده و آچيق دانيشيغيندا ايشلنن تركيبلر، عيباره‌لر و آتا سؤزلريني يئر- يئر شعرينده يئرلشديرير. آشاغيداكي بئيتلرين هر بيرينده، آتالار سؤزو و آغيز ادبياتي عيباره‌لريندن استفاده ائتميشدير:

سازي سكسنده اؤيره‌نن ادبار،

بيرده آني قيامت اولسا چالار!

 

بير ياخشي ايچون يامان سئوه‌رلر،

گول خاطيرينه تيكان سئوه‌رلر.

 

قدر كمال حوسنو بيلير عاشيق حزين،

البته قدرِ زرّي، خريدار اولان بيلر.

 

عن قصد جرمي‌يه ائله‌ديم عجز و انكسار،

مشهوردور: كپكله كؤپك كؤنلو شاد اولور.

 

قونشو تويوغو قاز گؤرونور قونشويا، سيّد!

اؤز ياريوي توت اؤزگه نيگاري نه گره‌كدير؟

 

اؤلمه ائشه‌گيم صاباح اولور ياز،

يونجا بيتيبن ايشين اولور ساز.

 

چيخاردي خاطيريمدن بوسه‌ي لعل لب جانان؟

نمك حاققين فراموش ائيله‌ينلر كامياب اولماز.

 

آت غمزه‌ن اوخون سيّده، اي قاشي هيلاليم!

روئين تنه يوز اوخ آتاسان، كارگر اولماز.

 

قدديندي سنين سرو خورامان، ذقنين سيب،

آمما نه دئييم سروده هرگيز ثمر اولماز.

 

دئديم:«خطّين ديشه‌ردي، كؤنلومو وئر، اي مه تابان»!

دئدي:«آخشام وئرمك خوش دگيلدير خانه‌دن آتش».

 

جمال يوسيفه يعقوب مئيليندن عيانديركيم،

كيشي اؤز اوغلونا عاشيق اولارميش، يار اولمازميش!

 

من ده انكار ائتميرم،‌ آمما كي واردير بير مثل:

شوخ قودوق شيللاق آتار دوشموش آناسيندان قاباق.

 

خلق هر چند دئيير بير گول ايله ياز اولماز،

چاغيرين اول گولو كيم مجليسيميز ياز اولسون.

 

بو مشهور بير مثلدير ساقي جان كيم: اؤيره‌نن دورماز،

اينانما گر ائشيتسن كيم ائديب مئيخانه‌لر تؤبه.

 

بو صَفّه‌ده پيري توللا گورگه،

دامه آتيلير كؤهن سوپورگه.

 

سيرشك چئشم تؤكوب آغلايار ايچون سيّد!

بو آرخاسو گليب، اومّيد وار بيرده گله.

 

دانيشيرلار هامي ائل آغزيني توتماق اولماز،

اي گول قونچه دهن خار ايله هريان گزمه.

 

ياغموردان ائيله‌ين فراري،

آخر دولويا دوشه‌ر گوذاري.

 

وارين وئرن دئيرلر اوتانماز، مثلدي بو،

جان نقدي الده، اولدوم او جانانا مشتري.

 

عبّاسيني ردّ ائدن سيپاهي،

يوخ عئيبي چيخارتسين آلتي شاهي.

 

5.  سيّد عظيم و موسيقي

سيّد عظيم شيرواني موسيقي مقاملاري ايله تانيش ايدي و گومان ائديلير كي موسيقي نظريه‌سي حاققيندا بير رساله‌ده يازميشدير. شعرلرينده يئر- يئر موسيقي‌دن آد آپارير و آذربايجان مغاماتلاريني سئوگي ايله ياد ائدير. اصلينده غزللريني‌ده عروضون ان اويناق اؤلچولرينده يازميشدير. همين موضوع ايله علاقه‌دار بير مخمّس‌ده قوشموشدور:

 

گوش قيل اي كي بيليرسن اؤزونو واقيف كار،

آگه اول گؤر كي نه‌دير ناله‌ي نئي، نغمه‌ي تار؟

نه‌دير اول خشك اولان چوبدا بو ناله‌ي زار،

كي صداسيندان اونون غارت اولور صبر و قرار،

آچماسن پرده‌ني، هر پرده‌ده وار يوز اسرار.

 

حال حاضيردا بير آذربايجانلي خواننده تاپماق اولماز كي سيّد عظيمين غزللريندن بير نئچه‌سيني مغامات هاواسي ايله اوخوماسين. اونون غزللري، خواننده‌لريميز آراسيندا ان چوخ اوخونان غزللر ساييلير.

 

6 . ديل بيلمه‌ قابليتي

سيّد عظيم آناديلي اولان آذري توركجه‌سيني چوخ ياخشي منيمسه‌ييب اؤيره‌نن و اؤز ديلينه سونسوز عشق و سئوگي بسله‌ين بير اديب ايدي. و ديليميزي نهايت درجه‌ده گؤزه‌ل و ساغلام يازيردي و اونا اؤره‌گينده مقدس عشق بسله‌ييردي.

باشقا ديللري اؤيره‌نمه‌گي ايسه، آنا ديليميزه ائشيت و موازي ياراتماق يوخ، بلكه بير مهارت كسب ائتمه كيمي قبول ائديردي. اونا گؤره أوچ: عرب، فارس و روس ديللريني‌ده اؤيره‌نميشدير و بو ديللرده يازيلان ادبي- بديعي اثرلري، ترجومه يولو ايله توركجه‌ميزه قازانديريردي.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی