تبلیغات اینترنتیclose
ديوانين نشره حاضيرلانماسي
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

موضوع : ديوانين نشره حاضيرلانماسي, | بازدید : 539

سيد عظيم شيرواني‌نين توركجه ديواني‌نين نشرلريني آشاغيدا معرفي ائديريك:

1.  ايلك نشر

ايلك دفعه اوغلو مير جعفر سيّد زاده اؤز آتاسي‌نين اثرلري آراسيندان حكايه‌لر و تمثيللريني مجموعه آدي ايله 255 صحيفه‌ده نشر ائتدي.[1]

 

2. تبريز نشري (داش باسماسي)

همين كيتاب 1274 شمسي (1313 هـ ./ 1895 م.) ايلينده تبريز شهرينده بير داها چاپ اولدو. تبريز نشري، تيفليس نشرينه گؤره نفيس شكيلده ايدي. همده شاعيرين بو نشره سيچان و پيشيك منظومه‌سيده سالينميشدير.[2] بو نشر 288 صحيفه ايدير.

 

3. ايكينجي تبريز نشري (داش باسماسي)

سيّد عظيمين ديواني بيرينجي دفعه ايسه تبريزده چاپ اولموشدور. تبريز چاپي 649 صحيفه‌دير. بو مجموعه‌يه قصيده‌لر، ترجيع‌بندلر، تركيب‌بندلر، تخميس‌لر، هجولر، غزللر، قطعه‌لر، تك بيت‌لر، حكايه‌لر، نصيحت‌لر، تمثيللر و ترجومه‌لر سالينميشدير. بو نشري حبيب صادق ترتيب ائتميشدي. بيز اونو چاپ اولموش ديوانلار آراسيندا ان دوزگون نشر حساب ائديريك. بو چاپ هيجري 1310 (1271 ش./ 1897م.) ايلينده ياييلميشدير.

 

4. غزليات سيّد عظيم

چوخ مكمّل‌اولان تبريز نشريندن سونرا، 1902 م. ايلنده باكي شهرينده غزليات سيّد عظيم آدي ايله بير مجموعه. مطبعه اصولي ايله چاپ اولدو.[3]

بو نشره شاعيرين غزللري و 15 پارچه باشقا نوع شعرلري سالينميشدير.

بو،‌ ايلك مطبعه نشري ساييلير.

 

5.  أوچونجو تبريز نشري

شمسي 1291 ايلينده بير داها تبريزده سيّد عظيمين قصيده‌لر و هجويه‌لريندن اولوشان پريشان آدلي بير كيتاب نشر اولدو.

 

6 . دؤردونجو تبريز نشري

دؤردونجو نشر يئنه تبريز شهرينه عائددير. بو نشر 1307 هـ . (1890 م.)ايلينده گئرچكلشميشدير.

بو نشره قصيده‌لر و هجولر سالينميشدير.

 

7. سئچيلميش اثرلر

باكي شهرينده 1930- نجو ايله لاتين حرفلري ايله سيّد عظيمين 47 غزلي و 58 روباعيسي نشر اولونموشدور. بو نشره مذنب و زيناللي اؤن سؤز يازميشلار.

 

8 .  لاتين حرفلري ايله ايلك نشر

لاتين حرفلري ايله بير داها 1937- نجي ايلده حبيب صمدزاده‌نين اؤن سؤزو ايله مكمّل بير نشر بوراخيلدي. بو نشره شاعيرين 611 غزلي، 105 روباعي، 6 مخمس، 2 ترجيع‌بند، 33 مختليف منظومه‌لر، 109 منظوم حكايه‌لر، 20مكتوب و 6 هجو سالينميشدير. بو كيتاب 590 صحيفه‌دير.

 

9.  سچيلميش شعرلري

1948 م. (1327 ش.) ايلينده يئنه باكي شهرينده گنجلر ايچون فيض الله قاسيم زاده طرفيندن شاعيرين سئچيلميش شعرلري[4] نشر اولدو.

10.  فيض الله قاسيم زاده‌نين نشري

1950- نجي ايلده سيّد عظيم شيرواني‌نين اثرلري ايكي جيلدده چاپ اولدو. بيرينجي جيلدده 592 غزل، ايكينجي جيلدده ايسه اجتماعي و طنزي شعرلري داخيل ائديلميشدير.

اثره فيض الله قاسيم زاده مقدمه يازميشدير. او، مقدمه‌نين بير يئرينده دئيير:

« . . . اؤيودلري‌نين چوخو، شاعيرين معلم‌ليك فعاليتي ايله علاقه‌دار اولاراق يازيلميش‌دير. مؤلفين بو نصيحت‌آميز پارچالاري، ايلك دفعه 1895- نجي ايلده تبريزده چيخان پريشان آدلي اثرينده درج اولونموشدور».

1960 - نجي و 1963- نجو ايللرده يئنه شاعيرين اثرلري ايكي جيلدده باكي‌دا نشر اولدو. بيرينجي جيلدده 587 غزل سالينميشدير. هر ايكي جيلدده بير چوخ شعرلر شاعير ديوانيندان حذف اولموشدور.

 

11. ايلك تنقيدي‌ نشر

1967- نجي ايلده سولئيمان رستم‌اف، سيّد عظيم شيرواني‌نين اثرلريني اوچ جيلدده نشر ائتميشدير.

بيرينجي و ايكينجي جيلدده غزللر، روباعيلر و باشقا شعر نوعلاري اوچونجو جيلده ايسه تذكره سالينميشدير.

اثرين مكمل چاپ حساب اولونماسينا باخماياراق جيددي نؤقصانلاري واردير. ترتيباتچي مقدمه يازير:

«بورايا ديني مضمونلو و يازديغي سوبژكتيو حسلرين مجموعه اولان اثرلري داخيل ائديلمه‌ميشدير. چونكي همين شعرلرين موعاصير اوخوجو ايچون ايده‌يا استه‌تيك اهميتي، كوتله ايچون منفعتي يوخدور. . .»

بو نا گؤره‌ده شاعيرين ان گؤزل تحميديه، نعت و منقبه‌لريني حذف ائتميشدير.

 

12. بيزيم نشريميز

بيزيم نشريميز آشاغيداكي أوچ متنين قارشيلاشديريلماسي ايله حاضيرلانميشدير:

الف. بيرينجي متن. تبريز داش باسماسي:

متنين بيرينجي صحيفه‌سي: ديوان مستطاب جناب املح الشّعرا، سلالة الاطياب، حاجي سيد عظيم شيرواني طاب ثراه كه محتوي قصايد نمكين و غزليات شيرين كه بالتّمام تركيدور.

متنين سون صحيفه‌سي: تمّت الكتاب بعونه و منّه وجوده في شهر ربيع الاول سنه 1309 من شهور هزار و سيصد و نه هجري.

بو متنده ديباچه‌دن سونرا، 250 صحيفه‌ده قصيده‌لر، 204 صحيفه‌ده غزللر و باشقا شعر نوعلاري، ايكينجي جيلدده ايسه 280 صحيفه‌ده ربيع الاطفال و سيچان و پيشيك منظومه‌لري يئرلشميشدير.

بيرينجي جيلدين بيرينجي حيصّه‌سينده، قصيده‌لردن علاوه، ترجيع بندلر (ص 175- 251)، بئشليك‌لر (ص 203- 233)، مستزادلار (ص 216- 218) و ايكينجي حيصّه‌سينده ايسه تركيب‌بندلر (ص 175- 192) يئر آلميشدير (3- 11).

ب. ايكينجي متن، آذر نشر چاپي:

بو متن بير جيلدده و 1937 م. ايلينده باكي شهرينده آذر نشرين بديعي ادبيات شعبه‌سي طرفيندن نشر ائديلميشدير. متن، 582 صحيفه‌دن عيبارتدير و لاتين اليفباسي ايله حاضيرلانميشدير. متنه 12 صحيفه‌ليك مقدمه‌دن سونرا، غزللر (ص 13- 219)، روباعيلر (ص 223- 236)، مخمّس‌لر (ص239- 244)، تركيب‌بندلر (ص247- 256)، مختليف منظومه‌لر (ص259- 291)، مدنيت و معارفه عائد منظومه‌لر (ص 293- 325)، منظوم حكايه‌لر (ص327- 525)، مكتوبلار (ص 527- 582) سالينميشدير. متنه حبيب صمدزاده 12 صحيفه‌ليك مقدمه يازميشدير (8- 11).

ج. أوچونجو متن، تنقيدي نشر:

بو متن سولئيمان روستم اف طرفيندن حاضيرلانميش و 1967- نجي ايلده آذربايجان علملر آكادمياسي طرفيندن 3 جيلدده سيريل الفباسي ايله نشر ائديلميشدير. بيرينجي جيلده شاعيرين غزللري (ص 35- 657)، روباعيلري (ص 652- 675)، قوشا بئيتلر (ص 677- 681)، تك بئيتلر (ص 683- 689)، قيطعه‌لر (ص 690- 695)، تركيب‌بندلر (ص697- 707)، مخمّس‌لر (ص 709- 720)، مسدّس (ص 721)، مستزادلار (ص 723- 729)، شرحلر (ص 731- 740) سالينميشدير.

ايكينجي جيلدده شاعيردن ساتيرالار (ص 7- 51)، مختليف شعرلر (ص 55- 113)، مكتوبلار (ص 117- 361) و ربيع الاطفال (ص 365- 603) گتيريلميش و شرحلر (ص 623- 652)، ايله قورتارميشدير.

أوچونجو جيلد 500 صحيفه‌ليك شاعيرين تذكره‌سين احتوا ائدير. اثرين علمي مقدمه و شرحلريني سليمان رستم‌اف يازميشدير (11- 11).

 

بيز نشريميزي حاضيرلاماق ايچون هر أوچ متني گؤز اؤنونه آلديق. تبريز نشريني اساس متن قبول ائده‌رك، باشقا ايكي نشردن يارديمچي متن كيمي استفاده ائتديك.

نشريميزده يئر آلان شعر نوعلاري‌نين سايي بئله‌دير: 607 غزل، 11 قطعه، 2 ترجيع‌بند، 2 تركيب‌بند، 4 مستزاد، 1 مربع، 8 مخمّس، 1 مسدّس، 83 رباعي، 20 دو بئيتي، 57 تك بئيتي.

بو جيلدده قصيده‌لرين نشري مقصديميز دگيلدير ولاكين نمونه اولاراق، سيّدين 8 قصيده‌سيني‌ده ديوانين باشيندا گترديك. منيم بو نشرده اساس مقصديم شاعيرين ديواني‌نين قصيده‌لر خارج، تام و ساغلام متنيني معاصر اوخوجويا چاتديرماقدير. اوميد ائديرم كي بو مقصده چاتا بيلميش اولام. بعضي املاء اؤزه‌لليك‌لريني‌ده ناچار اولاراق قبول ائتديم. بلكه اوخوجولارا سيد عظيم ايله راحات معنوي ارتباط قورماقدا كؤمكچي اولموش اولا بيلميشم. چكديگيم زحمتين اجري وارسا، سيّد عظيمين اوجاو پاك روحونا نيثار ائديره‌م.

 

دكتر حسين محمدزاده صديق

تبريز- دي 1385



[1] مجموعه اثر سيّد عظيم شيرواني، تيفليس، 1895 م.

[2] مجموعه اثر سيّد عظيم شيرواني، تبريز، 1313 هـ .

[3] غزليات سيّد عظيم شيرواني، شوكت مطبعه‌سي، باكي، 1902، (1319هـ .).

[4] سيّد عظيم شيرواني، سئچيلميش شعرلر، باكي، 1948.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی