تبلیغات اینترنتیclose
سندلر و قئيدلر
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

موضوع : سندلر و قیدلر, | بازدید : 778

 1. فريدون كؤچرلي

فريدون بيگ كؤچرلي (1242- 1299 ش.) يوز ايل بوندان قاباق يازديغي و نشر ائتديگي «آذربايجان ادبياتي تاريخي ماترياللاري» كيتابي‌نين ايكينجي جيلديني «نصرالله باهار ايامي و حاج سيّد عظيم دؤرو» آدلانديرير. همين كيتابدا اوتوز صحيفه‌دن زياده سيّد عظيم شيرواني حاققيندا يازي و اونون شعرلريندن سئچمه‌لر واردير. اونون حاققيندا يازديغي بؤلومو بئله باشلايير:

«حاج سيّد عظيم شيرواني نه اينكه يالنيز شيروان ولايتي‌نين، بلكه تامام آذربايجان توركلري‌نين اعاظم شعراسيندان بيري اولوب، اونون نام و شؤهرتي و شأن و روتبه‌سي حال حاضيردا ابناي وطنيميز مابئينينده كمالينجا اشتهار اولمايبسادا، گله‌جكده اولماسينا شوبهه يوخدور. حاج سيّد عظيم شيرواني‌نين و قاسيم بيگ ذاكر قاراباغي‌نين بو حالا كيمي نه ترجمه‌ي حاللاري و نه اشعار و آثاري كمالينجا اؤيره‌نيلمه‌ييبدير و بو غفلت و كم اعتناليق بيزيم حالا جهالت و كسالت ايچره ياشاييب قالماغيميزا بؤيوك دليلدير . . . ».

فريدون كؤچرلي‌نين سيّد عظيم حاققيندا يازديغي اوتوز صحيفه‌ليك يازي، اونون حاققيندا اولان يگانه معتبر منبع ساييلير. اوندان سونرا گلن تدقيقاتچيلار، عموميتله اونون سؤزلريني مختليف فورمالاردا تكرار ائتميشلر. بيزده سيّد عظيمين «ياشاييشي» بؤلومونو يازاندا، همين قايناغي گؤز اؤنونه آلديق. آشاغيدا اونون يازيسي‌نين بعضي جمله‌لريني نقل ائديريك:

«. . . بيچاره شاعيرين قدر و قيمتي حياتيندا ساخلانماديغي، بيزيم ايچون، بؤيوك بير تؤهمت و باعيث خجالتدير. اونون واختسيز وفاتي قلبيميزي حُزن ايله دولدورور.

. . . او مرحومون آداب و اخلاقي داخي اعلا درجه‌ده مستحسن اولدوغوندان، فضلا و عرفا مجليسينده همه وقت صدرنشين اولوب، فنون شعرده بي‌نظير اولدوغوندان ماعدا بديهه گولوق‌دا تورك شاعيرلري آراسيندا ميثل و برابري يوخ ايدي. بو باره‌ده حاج سيّد عظيم، روسلارين پوشكينينه، انگليسلرين بايرونونا و پولياكلارين ميسكويچينه برابر ايميش. بعضي واخت، مجليسين قيزغين حاليندا،‌ شاعير ذؤق و شؤقه گليب و اونون طبع گؤهرريزي‌نين چئشمه‌سي آچيليب، پئي در پئي، بلافاصيله، گؤزل، مسلسل و مؤزون شعر دئيرميش كي، تمام مجليس اهليني حئيرته گتيره‌رميش.

آذربايجان شاعيرلريندن هئچ بيريسي مرحوم حاج سيّد عظيم يازديغي قده‌رده اثرلر وجودا گتيرمه‌ييبدير. اونون هر قيسم كلامي واردير و بيري- بيريندن گؤزل و دلپذيردير.

. . . حاج سيّد عظيم اؤز عصري‌نين آئينه‌ي حقيقت نوماسي اولوب . . .

. . . انصاف و حقيقت مقامينا گلديكده، سيّدين سؤزلرينده نرّه‌جه افترا و يالان يوخدور. . .

. . . هئچ بير اسلام شاعيري، حاج سيّد عظيم كيمي ملّتين غئيرت و تعصّبون چكمه‌ييبدير، اونون اودونا اؤز جانيني ياخماييبدير».[1]

 

 2. شيخ آغا بزرگ

مرحوم شيخ آغا بزرگ تهراني، الذريعه الي تصانيف الشّيعه كيتابي‌نين 9- نجو جيلدي 482- نجي صحيفه‌سينده، 2733 ماده‌ده «ديوان سيّد شيرواني» عنواني ايله، سيّد عظيمين ديواني‌نين نشريندن سؤز ائدير و اونون حاققيندا معلومات وئردير:

« . . . و اسمه الحاج السيّد عظيم الشيرواني المتخلص سيّد، ولد 1251 و توفي 1308ق. طبع ديوانه بتبريز في 1313- 1351 بخط احمد بصيرت في مجلدين فيه اسماء جمع من شعراء معاصريه و معاشريه: نورس، عاصي، صفا، جرمي، يوسف، سالك، ثريا،‌مصور.»

شيخ آغا بزرگ بو سؤزلره قايناق اولاراق، فريدون كؤچرلي‌نين يوخاريداكي كيتابيني گؤسترير.

 

 3. خانبابا مشار

رحمتلي شيخ آغا بزرگ‌ون قيمتلي الذريعه كيتابيندان سونرا، خانبابا مشار، اونون آديني و ديواني‌نين چاپلاريني اؤز «فهرست كتاب‌هاي چاپي» كيتابي‌نين مختليف چاپلارينا، حؤرمتله داخيل ائدير و اونو «حاج سيّد عظيم شيرواني متخلص به سيّد» آدلانديرير. ديواني‌نين 1313 هـ . ايلينده تبريزده داش باسماسي اصوليله نشر اولماسيندان سؤز ائدير.[2] 

 

 4. محمد علي تربيت

رحمتلي محمد علي تربيت اؤز نوبه‌سينده «دانشمندان آذربايجان» كيتابيندا سيّد عظيم ايچون حؤرمت بسله‌يير و اونون حاققيندا بو سؤزلري يازير:

«حاج سيّد عظيم شيرواني متخلص به سيّد، از مشاهير آن ولايت است. در سنه‌ي 1251 تولد يافته و در سنه‌ي 1308 مرحوم شده [است]. صاحب ديوان و مثنوي است. كلياتش در تواريخ 1313 و 1315 در تبريز به خط ميرزا احمد بصيرت خوشنويس [در] دو جلد چاپ شده و معروف است و در ضمن اشعارش، بعضي از سخنوران معاصرين خود، مانند: نورس، عاصي، صفا، جرمي، يوسف، سالك، ثريا، مصور را اسم برده و تعريف از آن‌ها كرده است. و مخفي نماند كه در عهد اين شاعر نامي، در آن ولايت دو انجمن شعرا و ادبا، يكي به عنوان مجلس خاموشان در قاراباغ و ديگري به اسم بيت الصّفا در شاماخي تأسيس و داير شده بود كه سيّد عظيم مزبور و عاصي، نورس، ضويي، صفا، سالك، غافل، ظهوري، راغب، بيخود و غير آن‌ها از اعضاء نامي آن دو مؤسسه محسوب بوده و پيوسته آن دو مجمع با هم مطارحه و مشاعره داشته و با يكديگر مكاتبه و مراسله رد و بدل مي‌كرده‌اند.»[3]

مرحوم تربيت بو يازي‌نين سونوندا فريدون كؤچرلي‌نين آذربايجان ادبيات تاريخي ماترياللاري كيتابيني قايناق اولاراق ذكر ائدير.

 

 5. فيض الله قاسيم زاده

1960- نجي ايلده نشر اولان آذربايجان ادبياتي تاريخي‌ كيتابي‌نين 2- نجي جيلدينده يئرلشن 25 صحيفه‌ليك سيّد عظيم شيرواني بؤلومونو فيض الله قاسيمزاده يازميشدير.

قاسيمزاده بو بؤلومه بئله باشلايير:

« سيّد عظيم شيرواني 19 عصر آذربايجان ادبياتي‌نين گؤركملي سيمالاريندان بيريدير. او، عاشيقانه ليريك غزللري ايله، فضولي عنعنه‌لريني دوام ائتديرن شاعير، معارفچي شعرلري و ساتيرالاري ايله دؤورونون رئاليست صنعتكاري اولموشدور.»

او، يازديغي بو اوزون- اوزادي تحليلي مقاله‌سي‌نين سونوندا دئيير:

«سيّد عظيم شيرواني‌نين ياراديجيليغي، 19 عصر آذربايجان ادبياتي تاريخينده شرفلي بير يئر توتور. او، محبتي ترنّم ائدن، فضوليانه غزللري ايله، استعدادلي ليريك شاعير، معارفچي شعرلري، تمثيل، منظوم حكايه و ساتيرالاري ايله گؤركملي رئاليست صنعتكار كيمي تانينير. اونون ذاكر ايله صابر آراسيندا كؤرپو تشكيل ائدن ساتيريك شعرلري، 20 عصر ساتيريك شعري‌نين ايده‌يا- بديعي منبعلريندن بيري اولموشدور.»[4]

 

 6 .  جواد هيئت

جواد هيئت 1358- نجي ايلده تهراندا نشر ائتديگي «آذربايجان ادبيات تاريخينه بير باخيش» كيتابيندا، فريدون كؤچر‌لي‌نين و فيض الله قاسيم زاده‌نين يازيلاريندان استفاده ائدرك، سيّد عظيمدن حؤرمتله ياد ائدير و كيتابي‌نين 5 صحيفه‌سيني بو معلوماتي تكرار ائتمگه و شاعيري اوخوجولارينا دوزگون تانيتديرماغا سعي گؤسترير و سؤزلري‌نين سونوندا دئيير:

«سيّد عظيم شيرواني ادبيات تاريخيميزده آخوندزاده‌دن سونرا، استعدادلي ليريك، گؤركملي بير معارفچي ساتيريك شاعيري كيمي يوكسلميشدير. اونون قدرتلي و زنگين ياراديجيليغي ميرزا علي اكبر صابر كيمي داهي بير شاعيرين يئتيشمه‌سينده بؤيوك رول اويناميشدير.»[5]

 

 7.  آ. زاخاروف

آ. زاخاروف آدلي بير روس معلم و سياحي، 1887 م. ايلينده نشر ائتديگي «قافقاز توركلري آراسيندا خلق تحصيلي» اثرينده يازير:

« . . . حاجي سيّد عظيم 18 ايلدير كي مكتبي‌ اداره ائدير. داغستاندا تحصيل آلميشدير. فارس، عرب ديللريني و بير نئجه داغستان لهجه‌لريني بيلير. او، بيرينجي درجه‌لي شاعير كيمي تانينميشدير. اونون بديعي اثرلريندن ايلهام لحظه‌لري آدلي اثري، تبريزده نشر ائديلميشدير. شيروان خانليغي‌نين تاريخي آدلي بير اثرده يازميشدير كي حله اينديه‌دك نشر اولونماميشدير. اونون مكتبينده 33 شاگيرد اوخويور، اونلاردان 12 نفري هفته‌ده 15 و 9 نفري 20 و 12 نفري 25 قپيك وئرير كي 6 منات 60 قپيك توپلانير».[6] 

 

 8 .  تكرارچيلار

سيّد عظيم حاققيندا، دوست، دوشمن هر كيم قلم اله آليب يازي يازميشلار. ولاكين عموميتله يوخاريدا قئيد ائتديگيم قايناقلاردان آلديقلاريني تكرار و بعضا تحريف ائتميشلر. ميثال ايچون: دانشنامه ادب فارسي در قفقاز،[7] سرايندگان شعر فارسي در قفقاز،[8] آموزش زبان فارسي در جمهوري آذربايجان،[9] تذكره‌ي شعراي آذربايجان[10] كيتابلارينا اشاره ائتمك اولار. بو كيتابلارين مؤلفلري يالنيز قايناقلارين وئرديكلري معلوماتي دولانديريب تكرار ائديرلر و شاعيريميزي گويا تقليد‌چي، اقتباس‌چي و ترجمه‌چي كيمي گؤستريرلر. اونلارين تحقيقاتينا حاكيم روح، سطحي‌ليك، تكرار، فورماليته‌چي‌ليك و تحريفدير. بو تحريفدن و خبرسيزليكدن نمونه اولاراق آشاغيداكي جومله‌ني نقل ائديريك:

«در ميان آثار شاعر، يك كتاب درسي با نام ربع الاطفال وجود دارد كه براي تدريس زبان فارسي (؟) تأليف شده است!»[11]

 

 9. عزيزه جعفرزاده

چاغداش يازيچميز عزيزه خانيم جعفرزاده 1359 - نجو ايلده عالمده سسيم وار منيم عنوانلي سيّد عظيم شيرواني‌نين ياشاييش ماجرالاريني قاپسايان 300 صحيفه‌ليك بير تاريخي رومان يايينلادي. بو كيتابدا رومان ديلي ايله سيّد عظيمين دوغوموندان شهادتينه قده‌ر، ياشاييشي شرح ائديلير. رمان 23 فصله بؤلونموشدور:

1- شاماخي يوللاردان باشلار، 2- ايلك امتحان، 3- گؤروش يئري، 4- مصلحت، 5- پريلر سولطاني،        6- بست، 7- يئنه شاماخيدا، 8- آند، 9- مكتوبلاشما، 10- بيت الصّفا، 11- غمزه، 12- گوللوبگيم، 13- وداع، مصيبت، 14- زمانه‌نين ايكينجي لئيلي‌سي، 15- سونا، 16- چيلله چيخارتماق، 17- مصلّي، 18- آصلان و ايكي اؤكوز، 19- يئنه‌ده سونا، 20- ضديتلر ايچينده، 21- آنا دوعاسي، 22- قاراوللي‌ده، 23- ميزان ترازي ياخود دؤرد رمضان.

همين رومانين ميزان ترازي ياخود دؤرد رمضان عنوانلي سون فصليندن بير پارچاني نقل ائديريك.

. . . قيرميزي قولامين سسي جينلادي . . . ايلهام پريسي‌نين خيلاصكار سسي كيمي ائشيديلدي:

«- الله اؤزو ياخشي بيلير كي بنده‌لرين توتدوغو هر بير ايش، بؤيوك خاليق لم يزله عائددير. بيز نه كاره‌ييق كي اونون الي‌نين أوستونده ال اولمايان خاليقين بيلديكلريني تكرار ائيله‌يك. الله اعلم دئييبلر آخي. او اؤزو هامي‌نين ثوابينادا گوناهينادا عاليمدير. جناب شاعير آقا سيّد عظيم شيرواني ائله اوزوده بو خصوصدا يازيبلار. ايندي كي شعر و نظم اوخوماغا مئيدان وئريلدي، حضراتين اجازه‌سي ايله بيريني‌ده من دئييرم. جناب آقا سيّد عظيم اؤزو دئيير كي:

قرين مغفرتين ائيله جومله ظاهيردير،

نه ايش كي توتموشام، اي خاليق يگانه، سنا!

نصيب، سيّده توحيد ذاتين ائت، يارب!

چيخيب بدندن اولان دم روان روانه سنا.

 

هر بير بنده‌سي‌نين خئير و شرّ عمللريندن خبردار اولان خاليق، اؤزو سيّده ايلهام وئريب، بو سؤزلري دئديتديريبدير. يوخسا نئجه دئيه بيلردي؟ نييه بيز بوگون اينانماياق كي باياق شيخ اوخويان شعري، آقا جاوانليغيندا، من ايندي اوخودوغومو ايسه حاضيردا يازماييب و خاليقي‌ده اونو عفو ائله‌مه‌ييب، هه؟»

دوستلار راحات بير نفس آلديلار. «الله آتانا رحمت ائله‌سين مشهدي قولام، ياخشي گيريرسن آتانين قاني‌نين آراسينا.»

. . . هر نه ايسه بيردن سيّد عظيم و دوستلاري يئرلريندن قالخديلار. اونلار آرتيق مسجيدده قالماغي بي‌معنا حساب ائديرديلر. چونكي مباحثه‌نين سونو گؤرونموردو. اوزانديقجا، آجي باغيرساق كيمي اوزانا بيلردي. . . سيّد عظيم، مشهدي قولام و بير نئچه تانيش، باشماق گئييلن بالا دهليزه چيخاندا، آليشين گيزلي ايشاره‌سي ايله علي، منسيم، آقا حسين و عابيد افندي‌نين بير نئچه ثابت و صادق موريدلري‌ده قالخديلار. مسجيد جماعتي‌نين چوخو يئرلريندن قالخميشديلار. هامي بيردن- بيره قاپيا طرف أوز قويدو. سيّد عظيم، آرا قاريشا، مشهدي قولامدان آرالي دوشدو. و اؤزونو چوخ غريبه حسن ائتدي. بيردن بيره شعربافلار ائوي‌نين كلّه‌سينده، عابيد افندي‌نين موريدلري‌نين احاطه‌سينده اولدوغو كيمي تك، يالقيز، ياد روحلار، بيگانه جيسملر، دوشمن مخلوقلار آراسيندا! . . . اونو قاباقلارينا قاتاراق، سيخ دائره ايچه‌ريسينه آليب، مسجيد‌ين دهليزينه، باشماق چيخاريلان يئره آپاريرديلار. بلي، بلي، محض آپاريرديلار. چونكي آرتيق آياغي يئردن أوزولموشدو. چيگني أوستونده آليشين عفونتلي نفسي، گوجله ائشيديلن پيچيلتيسيني دويدو:«هه، جزاني چكه‌جكسن!» او، سونرادا هئچ بيلمه‌دي كي بو سؤزلر اونا دئييلديمي، ياخود او بو كلمه‌لري آليشين آجيقدان آليشيب يانان گؤزلريندنمي اوخودو؟

باشسيز كوتله اونو سيم - سيخ دمير منگنه ايچه‌ريسينده ايميش كيمي سيخيب، دار قاپيدان باشماق چيخاريلان دهليزه سالدي. آرا بير اونو احاطه ائدنلر سسله‌نيردي:

- آده ياواش، آقا قاباقدادي. . .

بير باشقاسي:

- ايته‌لشمه‌يين آده، كيشيني سيخيرسيز آخي . . .

- آي الله بنده‌لري، ياواشون آخي، آقا قاباقدادي . . . جدّينه قوربان اولدوغومو اينجيده‌رسيز آخي!

بو سون سؤزلري‌ده آليش دئييردي. آليش سيّد عظيمي آرخادان برك قوجاقلاميشدي، ساغينجا آقا حسين، سولونجا منسيم گئديردي. قارشيدا و آرخادا بير- بيريني باسان، ايته‌لشن آداملار . . . دوستلار آرخادان غريبه بير حسّ قبل الوقوع ايله نيگران قالميش، آداملارين آرخاسيندان بويلانير، گؤزلري ايله سيّد عظيمي آختاريرديلار. لاكين اؤزلريني اونا چاتديرا بيلميرديلر.

مشهدي قولام شاعيردن خئيلي دالدا قالميشدي. شيرين عبدالله ايسه ايره‌لي باسيليب باشماق چيخاريلاندان چؤله مسجيدين قاباغينا سالينميشدي. شيرين، قاپيدان بويلانير «آقا، آقا» دئيه أوره‌گينده پيچيلداييردي. لاكين ايچه‌ريده نه‌لر باش وئرديگيني باشا دوشه بيلمير، يامان بير شئي يووتمور، آمما انتظار ايچه‌ريسينده سيّدين چيخماسيني گؤزله‌ييردي. باشماق چيخاريلاندا ايسه غريبه آنلاشيلماز حادثه باش وئريردي. سيّد عظيم، بيردن نئجه اولدوسا، آليشين قوللاري آراسيندان چيخا، آرخاسيني باشماقچي‌نين سيخيليب دوردوغو ديوارا سمت چئويره بيلدي . . . باشماق رفلري أوستونه ديكلميش قوجا باشماقچي وضعيتي چوخ گئج درك ائله‌دي:

- آيه،‌نه قاييرديغووزدو؟

دئيه، هيجانلا سسلندي . . . :

- آيه،‌آقا حسين، منسيم . . . اكيشي . . . آقا، باشيوا دؤنوم . . . آي جماعت! كؤمك ائله‌يين!

سيّد عظيمين نفسي داراليردي. عابيد افندي‌نين موريدي و قاپاقلي‌نين نؤكرلري‌نين الي وجودوندا گزير، ديرسكلر بؤيورلريني دئشير، بارماقلار گاه بوغازيني، گاهدا كؤكسونو آراشديريردي . . . جاناور نفسي قولاغي‌نين ديبينده،‌دوداقلاري‌نين اوجوندا خيريلتي ايله سسله‌نيردي . . . سيّد عظيمين نفسي كسيليردي. دالدان آليشي ايته‌له‌ييب شاعيره كؤمكه گلمگه جان آتانلار، وضعيتي داهادا پيسلشديريردي.چونكي آليش و آقا حسين بو حالدان داها آرتيق استفاده ائدير و گويا جاني يانانليق ائيله‌يه‌رك تئز- تئز سس چيخاريرديلار:

- گئري دورون آده! ايته‌لشمه‌يين، دئميرم!

- ايته‌لشمه‌يين، يول وئرين آده، آقاني سيخيرسيز . . .

- آده كيشي‌نين نفسيني كسدوز كي!

كؤهنه قاپي داوام وئرمه‌دي، جيريلدادي. آليش، منسيم، آقا حسين،‌ موريدلر گورولتو و تاپبيلتي ايله چؤله تؤكولدولر. ايندي سيّد عظيم آرخادان اونو بؤيوك بير محبتله قوجاقلاييب ساخلايان و گؤزلري‌نين ياشي قلبي‌نين ايچه‌ريسينه تؤكولن قوجا باشماق ساخلايانلا بيرليكده قالميشدي. آداملار سئيره‌لنه ياخين، قيرميزي قولام اونا يئتيشدي. شيرين ايسه حله‌ده جماعت چؤله جومدوغوندان آداملاري ياريب ايچه‌ري گيره بيلميردي.

باشماق ساخلايان و قيرميزي قولام شاعيرين قولونا گيريب حيه‌طه چيخاراندا، مسجيدين صحنينده آرتيق اونلاردان هئچ بيريسي يوخ ايدي. قارا گروه قارا نيّتيني حياتا كئچيريب اورتادان چيخميشدي. شيرينين گؤزلري سيّد عظيمين أوزونه ساتاشاندا أوره‌گي اويجالاندي. شاعيرين رنگي كهربا كيمي ساپساري ايدي. ائله بيل اؤزونه زعفران ايسلاديب چكميشديلر. آياق اوسته گوجله دورموشدو. كسيك- كسيك نفس آليردي، نه دئيه‌جگيني، كيمدن نه‌دن شيكايت ائده‌جگيني بيلميردي . . . دوستلار شاعيرين قولتوغونا گيريب ائوه يوللانديلار . . .

. . . باييردا قاپي‌نين اؤنونده خئيلي آدام توپلانميشدي. غم درياسينا غرق اولموش شيرين عبدالله، «جعفر، اي قونچه‌ي گولوستانيم» دئيه آدي ايله بوتون گنج نسله خيطاب ائتديگي مير جعفر، صفادان دوشموش بيت الصّفانين مأيوس قوجامان عضولريندن آقا بابا ظهوري، علي اكبر غافيل، شاعيرين توي مراسيمينده اشتراك ائتميش ياخين دوستو غفار راغيب . . . جاوان شاعيرلردن شاگيردي علي اكبر صابر، آقا علي بيگ ناصح . . . بورادا ايديلر.

. . . رضا بيگ دئدي: حئيف! عمللري پوچ اولدو آقانين . . . اوّلي و سونو هئچ پوچ اولان دونيادا . . . ياخشي دئييب:

بي كسم عالم آرا، درد و غميندن اؤزگه،

نه هاوادار و نه ياور، نه كسيم وار منيم.

 

. . . باشقا بير سس: - آرخايين يات آقا، عَلَمين يئنه گؤيلره يوكسله‌جك. شاگيردي‌نين، آماليني وصيت ائتديگي صابري‌نين‌ الينده.

بير سس گلدي پريلر سولطانيمي، سيّد اؤزومو، اؤز مراسيمينده اوخويور:

موت جيسماني ايله سانما منيم اؤلمه‌گيمي،

سيّدا اؤلمرم، عالمده سسيم وار منيم.»

 

 



[1] فريدون كؤچرلي‌‌نين، آذربايجان ادبياتي كيتابيندان نقل اولوندو.

[2] باخينf خانبابا مشار، 2320.

[3] دانشمندان آذربايجان، ص 186.

[4] فيض الله قاسم زاده، 318- 291.

[5] جواد هيئت، 176.

[6] آذربايجان ادبياتي تاريخي، باكي، 1960، ج 2، ص 292 (روسجادان نقل و چئويري).

[7] نشر سال 1385.

[8] انتشارات اوقاف افشار.

[9] انتشارات شوراي گسترش زبان فارسي.

[10] انتشارات محمد ديهيم.

[11] آموزش زبان فارسي در جمهوري آذربايجان ، ص 39.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی