تبلیغات اینترنتیclose
ياشاييشي
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

موضوع : یاشاییشی, | بازدید : 592

1.  دوغومو

سيّد عظيم، هيجري 1251 هـ . (شمسي 1214- ميلادي 1835) ايلينده، فريدون كؤچرلي‌نين قئيدينه گؤره: ربيع الاول آيي‌نين 14- نجو گونو، شاماخي شهرينده دونيايا گؤز آچميشدير!

دوغولدوغو شيروان ولايتيني چوخ سئون سيّد عظيم، اورانين تعريفينه بير نئچه شعر حصر ائتميشدير. نئجه كي اونون سلفي خاقاني شيرواني، اؤز آنا يوردونو تعريف ائدركن دئيير:

گر چه تبريز شهره‌تر شهري است،

ليك شروان شريف‌تر ثغر است.

 

سيّد عظيم ايسه شيروان حاققيندا دفعه‌لر تعريف‌لر يازيبدير و بير نئچه قصيده، غزل و قطعه‌ده بو حاقدا دانيشيبدير. ميثال ايچون:

زمانه، تك يئتيريب حوسنده بو شيرواني،

گزين، تفحص ائدين، اللي‌مين ولايت وار.

دئييرلر عاقبت الامر بير قيامت اولور،

بو شهر ايچره ولي گونده مين قيامت وار . . . 

 

اونون شيروانا فخر ائتديگي بيرده اونا گؤره‌دير كي بو بؤلگه علم و ادب گهواره‌سي حساب اولور:

ايكي يوز اللي بيرده بعد هزار،

عصر سولطان محمد قاجار،

روما عبدالمجيد ايدي سولطان،

اولدو دارالولادتيم شيروان.

هانسي شيروان؟

او گولسيتان قديم،

اوندا شيروان شهيلر اولدو مقيم.

نه شاماخي كي اوندا عزّ الدين،

نظمدن ظاهير ائتدي سئحر مبين.

مسقط الرأس پاك خاقاني،

هونرين ذوالفقار برّاني.

نه شاماخي كه اوندا طبع باهار،

ائتدي يوزمين باهارلار اظهار.

 

2. تخلّص و آدي

عموميتله شعر آدي و تخلّصي سيّد دير و بوتون قايناقلار و شاعيرلرين ديلينده بو آد ايله تانينير. ولاكين غزللرينده گاه حاجي تخلّصوده گؤزه ده‌يير:

حاجي! علي محبتينه گئتمه كعبه‌يه،

مئيخانه‌ني طواف ائله‌كيم بوندادير ثواب!

 

3.  آتا و آناسي

سيّد عظيمين آتاسي سيّد محمد آدلي، شاماخي شهري‌نين محترم روحانيسي ايدي و اؤز زامانيندا شؤهرت و اعتبار صاحيبي ايدي.

اونون آناسيدا روحاني قيزي ايدي. ملا حسين آدلي بو روحاني، داغيستاندا، آذربايجانليلارين ياشاديقلاري دربند شهرينه باغلي ياق ‌ساي كندينده مكتبدارليق ائده‌ردي.[1]

 

4.  اوشاقليق ايامي

سيّد عظيم يئددي ياشيندا ايكن، آتاسي سيّد محمد وفات ائتميشدير. آنا باباسي ملا حسين، اونو آناسي ايله بيرليكده اؤز يانينا آپارميش و حيمايه‌سي آلتينا آلميشدير.

اون بير ايل داغيستاندا اقامت ائدن كيچك سيّد عظيم، تورك،‌ عرب و فارس ديللريني اوخوموش و صرف، نحو، ادبيات متنلري و ديني علملر ايله تانيش اولموشدور.

اون بير ايل سونرا دوغولدوغو شاماخي‌يا قاييتميش و 20 ياشلاريندا درسلريني تكميل ائتمه مقصديله نجف شهرينه گئتميش، اورادا تحصيل آلميش و سونرا بغداددا تحصيليني دوام ائتديرميش و شامدا يئرلشميشدير.

شعرلريندن آيدين اولور كي اونون گونلري شام ولايتينده آغير كئچيرميش:

ديار شاما اول گون كي مني حؤكم قضا چكدي،

نه مؤحنتدير گؤر اول ويرانه‌دن بو بينوا چكدي.

 

5.  سفرلري

سيّد عظيم، تحصيليني قورتارديقدان سونرا، وطنه قاييتميش و سونرا مكه‌يه زيارته گئتميشدير. همين سفر اثناسيندا،‌ مدينه‌ده، حضرت پيغمبر(ص)ين مزاري باشيندا، معروف يا رسول الله قصيده‌سي يازميشدير:

فدا بو آستانين خاكينا جان، يا رسول الله!

كي اهل دردده‌دير بو درده درمان، يا رسول الله!

 

حج زيارتيندن سونرا مصره سفر ائديب، بير مدت قاهيره شهرينده ساكين اولموشدور. اؤزو سفرلري حاققيندا يازير:

ائيله‌ديم عارفانه كسب علوم،

گاه بغداد مسكنيم، گه روم.

ائيله‌ديم ميصر و شامدا مأوا،

گاه يئريم يثرب اولدو، گاه بطحا.

اوخودوم صرف و نحو و فيقه و اصول،

حكمت و هيئت ائيله‌ديم محصول.

تا كي مستجمع علوم اولدوم،

نظر اهل عصره شوم اولدوم.

ائيله‌ديم تا كي هر بوساطا گوذر،

مني گؤردوكده خلق، سؤيله ديلر:

بودو گلدي سفاهتين كافي،

حاجي سيّد عظيم شيرواني! 

 

نجف، كربلا، شامات، قاهيره و بيت المقدس سفرلريندن علاوه، سيّد عظيم 40 ياشيندا اردبيل شهرينه‌ده علمي سفر ائتميش و بير مدت اورادا قالميشدير كي، باشقا بؤلومده بو حاقدا دانيشاجاغيق.

 

6 .  پئشه‌سي

سيّد عظيم سفرلريندن سونرا، شاماخي شهرينده يئرلشديكدن سونرا، مكتبدارليق ائتميش و درس دئميشدير. او، اؤزو اصول جديد شيوه‌سي ايله مكتب آچميش و درسليك يازميشدير. ولاكين مكتب آچمادان قاباق آرا- سيرا تاجيرلر و خانلار يانيندا ميرزاليق ائتميش و معاش آلميشدير. مادي دورومودا هئچ زامان ياخشي اولماميشدير. اؤزو دئميشكن:

چوخ ائتديم دهرده هر كارا خيدمت،

گهي خانا، گهي تجّارا خيدمت.

بيريندن اولمادي رفع ملاليم،

كئچيندي مؤحنت و عُسرتده حاليم.

 

عؤمرونون سون ايگيرمي ايليني ايسه مكتبدارليق ايله كئچيرميشدير.

 

7. مكتبدارليق

سيّد عظيمين اساس ايشي مكتبدارليق ايدي. سندلرده گؤسترديگيميز كيمي، اونون چاغداشلاري، مكتبدارليغيني سيتايش و تعريف ائتميشلر. او، اؤز مكتبيندن باشقا، دؤلت طرفيندن آچيلان رسمي مكتبلرده‌ده معلم‌ليك وظيفه‌سينده ايشله‌ميشدير.

سيّد عظيم، حاج ميرزا حسن رشديه‌نين يئني اصول ايله آچديغي مدرسه‌لره بنزه‌ر مكتب آچميشدير. او، رشديه كيمي اؤز مكتبينده درس وئرمه درسليگيني ده اؤزو يازميشدير. فريدون كؤچرلي بو حاقدا دئيير:

«مرحومون ترتيب ائتديگي كيتابچادان، بير نوسخه‌سي اؤز دستخطي ايله يازيلميشدير . . . بو مجموعه أوچ دفتردن عيبارتدير:

اوّلينجي دفترده يازيليبدير: شيخ سعدي‌نين گولوستان و بوستان كيتابلاريندان و بعضي حكمانين اثرلريندن، ساده و آچيق تورك ديلينه ترجومه اولونموش نصيحت‌آميز حكايه‌لر.

ايكينجي دفترده همچنين بو قيسم حكايه‌لردن و 51 اؤيود و نصيحت‌لردن عمله گلير.

أوچونجو دفترين مندرجاتي نظم ايله يازيلميش اخلاق و اطوارا دائر تمثيللردن عيبادتدير. بونلاردان علاوه، بير پارچا خيرداجا مضحكه‌لر و گولمه‌لي حكايه همين دفترده يازيلميشدير كي اونلارين حيصّه‌سي و نتيجه‌ي كلامي دوروست و صحيح ايسه‌ده، اؤزلري تعليم ايچون ياراماز. بو مضحكه‌لردن و گولمه‌لي حكايه‌لردن باشقا، أوچونجو دفترده بير نئچه گؤزل غزل . . . و بير پارا قيطعه‌لر و روباعيات يازيلميشدير.»[2]

 

قئيدلره گؤره، سيّد عظيم 1877 م. (1251 ش.) ايلينده روس دؤلتي طرفيندن شاماخي‌نين شه‌هر مدرسه‌سينده شرعيات و لسان توركي تدريسي ايچون، رسمي معلم‌ليگه تعيين اولوندو و عؤمرونون سونونا قده‌ر 15 ايله ياخين همين مدرسه‌ده درس دئدي. اونون دوستو شاعير عاصي قاراباغي سيّد عظيمين روس دؤلتي طرفيندن ايشه دعوت اولونماسي ايله علاقه‌دار مزه‌لي شعر يازميشدير:

شنيده‌ام كه به پيري كشيش دير شدي،

خوشا به حال شما، عاقبت به خير شدي!

 

بو 15 ايل ايچينده، دؤلت طرفيندن اونو چوخ اينجيديب و دفعه‌لر مختليف بهانه‌لر ايله ايشدن اخراج ائديب و استنطاق ايچون تيفليس شهرينه آپاريرديلار. بو سفرلرين بيرينده، تيفليسه گئتديگي واخت، گنجه‌ده نظامي‌نين مزاري أوسته بو روباعيني يازميشدير:

اي شيخ نظامي! اي نظامي داغيلان،

اي گنجه‌ده عزّ و احتشامي داغيلان!

اولموبدو سنينله من كيمي عالمده،

بئيتي، ائوي، مكتبي، كلامي داغيلان!

 

8 .  اؤلومو

سيّد عظيم شيرواني 1305 هـ . (1267 ش. - 1888 م.) ايلي رمضان آيي‌نين 21- نجي گونو، 53 ياشيندا شاماخي شهرينده وفات ائتميش و اورادا شاه خندان مزارليغيندا دفن ائديلميشدير.

  اونون آجي اؤلومو، او زامان هر كسي ناراحات ائتميشدي و بير چوخ شاعيرلر بو حاقدا مرثيه يازميشلار. اونلاردان بيري ناصح شيرواني دير. اونون مرثيه‌لري‌نين بيريسي بئله‌دير:

قان آغلا گؤزوم! سرور دؤران گئتدي،

سر دفتر اهل فضل و عرفان گئتدي.

افسوس، او شاعير و اديب و كاميل،

احبابين ائديب زار و پريشان گئتدي.

آئينه‌ي اوقات ايدي اول ذات شريف،

سنگ اجل ايله سيندي، الان گئتدي.

حئيرتده‌يم، اي خاك! نئجه سينديردين،

آغوشونا تا او بحر عمّان گئتدي.

 

جوفوندا چوخ ايدي گر چه كان زر و لعل،

دفن اولماغا سنده باشقا بير كان گئتدي.

ائتميشدي قضا گر سني امواتا مقام،

فخر ائت كي بوگون جيسمين ايچون جان گئتدي.

ناصح دئدي تاريخ وفاتين غم ايله:

صد حيف اولا، سيّد شيروان گئتدي![3]

 

ديوانيندا، بير چوخ يئرده اؤزونون ياشينا اشاره ائتمه‌گيني گؤروروك. ميثال ايچون بير غزلي بئله باشلايير:

جاوانلار گلدي دونيايا، قوجالديم، حئيف! پير اولدوم،

قووالار دوشدو قوّه‌تدن،‌ يامان يئرده فقير اولدوم.

يئتيشدي اللي‌يه ياشيم، تؤكر سو چئشم خون پاشيم،

آغاردي برف تك باشيم، دؤنوب بير زمهرير اولدوم.

 

بير روباعي‌ده اؤزوده دوغومونا ايشاره ائتميشدير:

مين أوچ يوز ايدي، اللي‌يه يئتدي ياشيم،

كافور كيمي غمدن آغاردي باشيم.

 

 



[1] فريدون كؤچرلي، آذربايجان ادبياتي تاريخي ماترياللاري، ص 30.

[2] فريدون كؤچرلي. آذربايجان ادبياتي تاريخي ماترياللاري، باكي، 1926،‌ ايكينجي جيلد، ص 40.

[3] ماده تاريخين ابجد حسابي ايله دوز چيخماسي ايچون ايكي شيروان و گئتدي كلمه‌لريني، شروان و گيتدي فورماسيندا يازمالييق.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی