تبلیغات اینترنتیclose
بيت الصّفا
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

موضوع : بيت الصّفا, | بازدید : 607

سيّد عظيم شيرواني‌نين ياشاديغي چاغي، ادبيات تاريخيمزين قالخينما چاغي سايا بيله‌ريك. بو چاغدا، اوتايدا و بوتايدا بؤيوك شاعيرلر ظهور ائديرلر. بير طرفدن شاعيرلر شعريميزده فضولي- نباتي عنعنه‌لريني ساخلاييب دوام ائتديرير و باشقا طرفدن ياواش- ياواش يئني‌ليگه مئيل گؤستريليردي. مكتبخانالار آچيلير و شاعيرلر طرفيندن شعر توپلولوقلاري قورولوردو، مطبوعات انكشاف تاپير، نشريه‌لر بوراخيليردي. سيّد عظيم بو ساحه‌لرين هاميسيندا فعالجاسينا اشتراك ائديردي. يوخاريدا گؤردوگوموز كيمي، سيّد عظيم بير طرفدن مكتب آچيب، درس كيتابلاري حاضيرلاييردي و باشقا طرفدن ادبي محفيللره باشچيليق ائدير  و نشر اولان مطبوعات اورگانلاريندا اؤز شعرلريني چاپ ائتديريردي. اونون تأسيس ائتديگي ان مهم ادبي محفيل بيت الصّفا آدلانيردي.

بو ادبي انجمن عضولريندن: آقا بابا ظهوري، ضويي، علي اكبر غافيل، ملا آقا بيخود، غفار راغيب و محمد صفاني آد آپارماق اولار.

سيّد عظيم بو ادبي محفيلي، اؤزونون ياخين دوستو و چوخ سئوديگي شاعير محمد صفانين ائوينده تشكيل وئرميشدي. بيت الصّفا ادبي انجمني، قاراباغدا قورولان مجلس خاموشان و باكي شهرينده تشكيل تاپان مجمع الشّعرا ايله علاقه ساخلاييردي. اونلارين او زامان، اورتاق اجلاسلاري اولورموش. دربند شهرينده ياشايان تانينميش نوحه شاعيريميز ميرزا محمد تقي قمري‌ده گاهدان بو محفيلده اشتراك ائديردي.

او زامان آذربايجانين مختليف شه‌هرلرينده ياشايان شاعيرلر، ادبي انجمنلر و محفيللر ياراديرديلار كي بيت الصّفا اونلارين باشيندا گئديردي و بو محفيلين رئيسي سيّد عظيم، هامي ايچون احترام و سايغي صاحيبي ايدي. سيّد عظيم حتي نجف و شاماتدا ياشاديغي زامان، بيت الصّفاني ياددان چيخارتميردي. اونون:

شيروانا سني ائيلرم اي نامه روانه

 

مطلعلي مستزادي اصلينده بيت الصّفا عضولرينه خيطابدير. او بئله‌ليكله ضويي، بيخود و غافيل ايچون بير مكتوب يازيب، اوره‌ك دردلريني بيان ائتميشدير. بو منظوم مكتوبدا بيت الصّفاني مقدس بير مكان حساب ائديب، دئيير:

اول مجليسه كيم روح الامين آلماسا روخصت،                            يوخ گيرمگه فورصت!

توپراغا دوشوب عجز ايله أوز قوي او مكانا،                       تاپ اونا بهانه.

ضويي‌نين آياغيندان اؤپوپ كسب ضيا قيل،                    اظهار ثنا قيل.

احواليمي چك بيخودا رمز ايله بيانه،                                       شرح ائيله فسانه.

اول واخداكي حاليم ائله‌دين غافيله اظهار،                      بير گيزلي سؤزوم وار.

احبابدا محرم اودو بو سيرر نهانه،                                  كشف ائتميشم آنه.

 

سيّد عظيم، قاراباغدا تأسيس ائديلن مجليس خاموشان عضولري، خصوصيله عبدالله عاصي (1840- 1874) باكي شهرينده قورولان مجمع الشّعرا عضولريندن عبدالخالق يوسفي (1849- 1924) لنكراندا اسماعيل قاصير (1824- 1897)، نوخالي اسماعيل ناكام (1829- 1905)، دربندلي ميرزا محمد تقي قُمري (1819- 1892)، گنجه‌لي ميرزا مهدي حاجي. و باشقالاري ايله شعرله‌شيردي. معاصرلري اونو سرآمد دؤران آدلانديرميشديلار.

سيّد عظيم بيت الصّفا شاعيرلري ايله چوخ ياخيندان دوستلوق ائديردي و عموميتله اؤزو ايله اونلارين آراسيندا معنوي و درين بير احبابليق ياراتميشدير. ديواني‌نين مختليف يئرلرينده اونلارين اؤلوب الدن گئتمه‌لريندن درين كدرلنمه‌سي حس اولونور. شوشا شهرينده محفيل خاموشان عضوو نورس قاراباغي‌يه يازديغي بير قصيده، بو باخيمدان چوخ سجيوي‌دير. بو قصيده باشدان آياغا سوزناك شيكايتلر ايله دولودور. قصيده‌دن بير نئچه بئيتي گتيريره‌م:

سلام اولسون سنه اي كعبه‌ي اهل صفا، نورس!

مناي كويووا اولسون دل و جانيم فدا، نورس.

منه بيگانه‌دن بيگانه اولدون عاقيبت، اي شه!

سنينله اولمايايديم كاش ازلدن آشينا، نورس!

مگر يوخ مهربانليق شوشانين آب و هاواسيندا؟

دؤنوبدور داشا كؤنلون اي رفيق بي‌وفا، نورس!

نه بير پئيغام گؤنده‌ردين بو مدّتده نه بير قاصيد،

مگر بؤيله اولورموش آشناليق، مرحبا! نورس!

اگر چه دهردونون انقلابيندان پريشانام،

اولوب جمعيّتيم برهم، فلك ائتميش جفا، نورس!

داغيلدي يار و انصاريم باشيمدان، فرد قالديم من،

اليمدن گئتدي عاصي، اول رفيق خوش ادا، نورس!

صفا دوشدو صفادان، زمزم اشكيم روان اولدو،

بو غمدن خانه‌ي دل كعبه تك گئيدي قارا، نورس.

 

 

نه آگه، آگه اولدو حالت پُر اختلاليمدان،

نه رفع ائتدي ملاليم صفحه‌ي دلدي فنا، نورس!

مگر بؤيله اولورموش آشيناليق، اي گؤزوم نورو،

جمال باكماليندان گؤزوم گؤرمز ضيا نورس.

بيز آخر بير گولوستانين گولويدوك روز اوّلده،

حوادث صرصري سالدي بيزي آخر جدا، نورس.

اول اوستاد مكرّم، يوسيفي، اول مرشد كاميل،

اونو گرگ اجل صئيد ائتدي، حئيف اول مقتدا، نورس.

اولوب بو عالم احبابدا هر ساده رخ يارا،

بيز ائتديك دامن معشوقه‌ني الدن رها، نورس!

حيات مستعار دهردن مطلب دگيل حاصيل،

گره‌ك كسب ائيله‌مك يوز سعي ايله فئيض بقا، نورس.

. . . چكيل عنقاي قاف اول بير قناعت ايچره سيّد تك،

وئره‌ر مقسوموو اول خالق ارض و سما، نورس![1]

 

سيّد عظيم، بيت الصّفا و باشقا اشتراك ائتديگي ادبي محفيللرين شاعيرلري‌نين آدلاري و اثرلريندن نمونه‌لري اؤز تذكره‌سينده ذكر ائتميشدير.

بير باشقا غزلده اؤز چاغداشلاري‌نين آدلاريني نظمه چكيب و اونلاري بير به بير ياد انتميشدير:

نئچه رديف غزل ائتديم انتخاب، دئديم،

نظيره‌ي شُعراي فلك جناب، دئديم.

اولار كي هر بيري بير آفتاب رخشاندير،

بو ذرّه تا اولا خورشيده انتساب دئديم.

نظيره‌ي غزل جرمي‌يه ائديب اقدام،

هزار جورمو، قصور ايله بير جواب دئديم.

حيجاب ائيلمه‌ديم گوفته‌ي ثريادان،

جواب اول اختر تابانا بي‌حيجاب دئديم.

 

مُنيري نيّر اعظمدي چرخ نظم أوزره،

نه عئيب گر اونو نيسبتده آفتاب دئديم؟

جيگرده داغ نهان بير جواب دلخون‌ـه،

خجالت آتشينه دل اولوب كباب دئديم.

كؤنولده وار نهان اشتياق مشتاق‌ـا،

اولور كي بيرگون اولا وصله فتح باب دئديم.

اوميد وار كي ائده عفو جورمومو جُرمي،

خطالاريمي بيليب سيّدا جواب دئديم.

 

آشاغيدا بيت الصّفا عضولري و سيّد عظيمين علاقه ساخلاديغي معاصيري اولان بعضي شاعيرلردن آد آپاريريق:

 

1. محمد صفا

محمد صفا (1268- 1293هـ ./ 1832- 1876م.) نين پئشه‌سي بزازليق ايدي. اونون اؤز عصرينده چاغداشلاري آراسيندا چوخ حؤرمتي اولموش، بئله‌كي فريدون كؤچرلي دئميشكن:

«شاماخي شعراسي اونون آدينا بير منزيل بينا ائديب بيت الصّفا آدي ايله اونو آدلانديرميشلار. شعرا و عرفا اورايا جمع اولوب، شعر و غزل دئمكله و روحاني صؤحبتله صرف اوقات ائده‌رلرميش».[2]

كؤچرلي، سؤزلري‌نين دواميندا يازير:

«صفا، اؤزو غايتده گؤزل، نازنين و غيور بير اوغلان ايميش. اونا قارا لقبي قويولموشدو. نئجه كي افصح شعرا حاجي سيّد عظيم اكثر كلاميندا اونا نسبتاً ايما و اشاره‌لر يازيبدير. او جومله‌دن:

قادان آليم آي قارا گؤز! سنه بو ادا نئچوندور؟

نه اوزون آراليق ائتديم، منه بو جفا نئچوندور؟

ياناغيندا لاله نيسبت، دوداغين عقيق مانند،

بدنين سفيد و صافي، بس آدين قارا نئچوندور؟

منه‌ده قارا گره‌كدير، كي منيم گونومدو قارا،

بو آدي، وفالي دلبر دة گؤروم سنا نئچوندور؟

بو، داهي سيّد مرحوم بير غزلينده صفانين حاققيندا دئييبدير:

سنسن بو عصرين، اي بوت زيبا! محمّدي،

سيّد هم آستانينا كمتر بيلالدير.

 

محمد صفاني 1293 هـ . ايلينده فتله يئتيرميشلر. سيّد عظيم اونون اؤلومو ايله علاقه‌دار دئيير:

صفا برفت دگر جام عشرتم بشكست،

مگر براي من، اي پير! بد دعا كردي؟!»[3]

 

2. ملا آقا بيخود

ملا آقا بيخود شيرواني، (1247- 1310 هـ ./ 1830- 1892 م.) سيّد عظيمين ديليجه دئسك:

«بير جواندير پاك سيرت و پاكدامن، تجارت پيشه و خير انديشه، نجيب خصلت و درويش طبيعت، فهيم و زيرك و عرفا مسلك».

بيخودون اكثر شعرلري عاشيقانه‌دير. سيّد عظيم اؤز تذكره‌سينده اوندان بير چوخ شعر نقل و تفسير ائديبدير:

كؤنول آلوده قيليب بير بوت عيارا مني،

ائديب آشوفته عجب دلبر خوانخوارا مني!

غم روييله گونوزلر جيگريم قانا دؤنر،

گئجه‌لر زولفو خياليله باسار قارا مني.

دئديم: اي دل! حذر ائت نائره‌ي عشقيندن،

ياخما آللاهي سئوه‌ر‌سن يانار اودلارا مني.

الله! الله! نه كؤنولدور كي اوسانماز بير دم،

لحظه- لحظه گتيره‌ر ناله ايله زارا مني.

دئديم: آلدانما كؤنول نرگس جادولارينا،

حق رضاسينا اسير ائتمه بو سحّارا مني.

سالاجاق چؤللره مجنون كيمي آخر، بيليرم،

بو قان اولموش، غمه ياتميش، دل صدپاره مني.

نولا بيخود كي او بي‌مئهر و بوت عاشيق‌كش،

بير نيگاه ايله آليب جانيمي قورتارا مني.

 

ملا بيخود بيت الصّفا عضوو ايدي و سيّد عظيم دفعه‌لر اونون آديني شعره ساليبدير. فريدون كؤچرلي اونون حاققيندا يازير:

«مرحوم بيخود غايتده خوش خاصيت، با تواضع، گشاده جبين و سليم النّفس بير شخص اولوب، مدت عؤمرونده، جومله مناهيلردن و شرب خمر و غير مذموم عمللردن اوزاق ايميش. ولاكين هم مسلك ادبا و عرفا و هم جليس شعرا اولوب، اكثر كلاملاريندا حكمت‌آميز مطلبلر سؤيله‌ديگيندن ظاهيرپرست، يك چشم و فاناتيكلر آراسيندا متهم اولموشدور».

ملا آقا بيخود، غزللريني فضوليانه يازميشدير و اونون كيمي حكمت‌آميز عيباره‌لري غزللره داخيل ائتميشدير. ميثال ايچون ياريشا قويولان فضولي‌نين:

طريق فقر توتسام، طبع تابع، نفس رام اولماز،

غنا قيلسام طلب، اسباب جمعيت تامام اولماز.[4]

 

مطلعلي غزلي استقباليندا دئيير:

رياضت‌سيز كؤنول بو نفس بير تؤسندي، رام اولماز،

بونا جولانگه عرصه ارض اولا، سئيري تامام اولماز.

جهاني دوست توتدوقجا ائده‌ر دوشمن چيليك پئيدا،

بو دوشمن كامدان اي نفس! حاصيل، هيچ كام اولماز.

جهان معموره‌سينده كونج عوزلت اختيار ائيله،

قناعت اهلينه، اي دل! بئله راحت مقام اولماز.

آياقدان دوشمه‌ميش سعي ائيله‌ الدن وئرمه مئي جامين،

جوانليق شورو قالماز باشدا بو نشئه مدام اولماز.

بورونمه خيرقه‌ي سالوسا بيخود! طعنه‌دن قورخوب،

كي مئيدانِ محّبتدير، بو يئرده ننگ و نام اولماز.

 

اونون سيّد عظيم شيرواني‌يه خيطاب يازديغي بير مستزاد معروفدور. بو مستزاد بئله باشلايير:

كيم وئردي دونن بزمينيزه باغدا زيور،                     هانسي قدر عرعر؟

كيم ائيله‌دي روخساري ايله باغي منوّر،                هانسي مه انور؟

 

3. علي اكبر غافيل

بيت الصّفا مجليسي‌نين عضولريندي بيريسي ناماز اوغلو علي اكبر غافيل ايدي. اودا شاماخي شهرينده (1244- 1309 هـ ./ 1828- 1892م.) دوغولموشدور. اونو شعرشناس و غايت فصيح بير وجود[5] اولاراق وصف ائديرلر. سيّد عظيمين تأثيري آلتيندا و اونو سيتايش ائدن شاعيرلردندير. آشاغيداكي غزل اونون بيت الصّفادا قاراباغليلار طرفيندن ياريشا قويولان فضولي‌نين،‌ قابداقدا يازديغيم غزلينه نظيره‌دير:

منه اول دلبر آهو نيگه مدّتدي رام اولماز،

نه بير وصلي منه مقدور، نه‌ده عؤمروم تامام اولماز.

كؤنول! او دلبر خودكامه‌دن كئچ كامه يئتمكدن،

نئچون ناكامليقدان ياخشي هئچ عالمده كام اولماز.

حبيبم كعبه‌ي كويوندا سرگردان اولان عاشيق،

دولانيب باشينا قوربانين اولسا، بي‌مقام اولماز.

حرام اولموش اگر قان تؤكمك، اي مه! لئيك عشّاقين،

گؤزون قورباني، تؤك قانين، حلاليندير، حرام اولماز.

اولا هر مولك دل كيم، لشكر غمزه‌ن گذرگاهي،

دوشر رؤونقدن اصلا، اوندا قانون و نيظام اولماز.

وئريب جانانا جان، غافيل! گل ايندي سن‌ده بير آد ائت،

كي اهل عشق ناميندان سوا عالمده نام اولماز.

 

4. غفار راغيب

فريدون كؤچرلي غفار راغيب (1234- 1309 هـ . / 1818 - 1891 م.) حاققيندا يازير:

«بيت الصّفانين خوش باطن، خوش خلق، مؤدب، باكمال، سليم و صامت عضولريندن بيريسي اولوب، هم عصرلري آراسيندا گؤزل نام و حؤرمت كسب ائتميشدير».

غفار راغيب سيّد عظيمين ادبي اجلاسلاريندا اشتراك ائديردي. اونون قاراباغ ياريشينا يازديغي غزلدن بير نئچه بئيت نقل ائديريك:

منيم روحومدو بير دلبر، ولي جيسميمه رام اولماز،

عجب كيم روحسوز جيسم ايله عؤمروم هم تامام اولماز.

 

ييخار كؤنلوم ائوين بير مه‌ليقا، غافيلدير آندان كيم،

منيم كؤنلوم ييخان، دونيا ائوينده شادكام اولماز.

گؤروب روخساري أوزره زولفونو، بيلديم غلطدير بو،

كي دوزخ اهلينه دئرلرسه گر جنّت مقام اولماز.

ائده‌ر سولطان حوسنون چوخ سياست، قورخوم اولدور كيم،

بئله سولطان ظاليم هيچ مولك ايچره مدام اولماز.

ملامت ائيله‌ين راغيب مني، شرم ائيله‌مز، بيلمه‌ز،

طريق  عشقده بو رسمدير كيم ننگ و نام اولماز.

 

5. محمد ضوئي

ملا محمد ضوئي بيت الصّفا انجمني عضولريندن و سيّد عظيمين اعتنا و احترام ائتديگي او چاغين شاعيرلريندن بيريسي دير. سيّد عظيم يازير:

«تولد شريفلري مين ايكي يوز اللي دوققوزونجو ايلينده خطه‌ي شيرواندا واقع اولوب، تا بو گونلرده كي ايگيرمي بئش سنينه قدم باسميشدير، علم عرب و فارس فئيضين طاليبلره يئتيرمكده و طلّابلاردان گولوستان ذاتيندا گول معرفت بيتيرمكده‌دير . . . الحق خط شيكسته‌ده عمادا، نسخ تعليقده رشيد و ياقوتا برابردير».[6]

سيّد عظيم اؤز ديوانيندادا گاهدان ضوئي‌ني ياد ائدير:

شؤوقدن كؤهل صيفاهان كيمي دورتر گؤزونه،

سيّدا يئتسه اگر ضوئيِ زارا بو غزل!

 

و اونا چوخ حؤرمت بسله‌يير. اؤزونون گؤنده‌رديگي بير نامه‌سينه خيطاب دئيير:

ضوئي‌نين آياغيندان اؤپوپ كسب ضيا قيل،

                                      اظهار ثنا قيل. . .

 

كؤچرلي‌نين يازديغينا گؤره،‌ اونون ياشاديغي زاماندا «موغاندا، نباتي‌نين وطنينده، خانليق كندينده مكتبدارليق ائديردي».[7]

 

6 . آقا بابا ظهوري

آقا بابا بن عبدالله ظهوري 1265 هـ . (1849 م.) ايلينده دوغولموش و 1310 هـ . (1892 م.) ايليندن سونرا وفات ائتميشدير. بيت الصّفانين فعال عضولريندن ايدي. اونون قاراباغ شاعيرلري طرفيندن ياريشا قويولان فضولي غزلينه يازديغي نظيره بئله‌دير:

نه وحشي كؤنلوم اول آهو نيگه‌دن غئيره رام اولماز،

نه آنين هيجري‌نين نؤقصان اولان آيي تامام اولماز.

موراديم جان فدا قيلماقدي يئتجك وصل جانانا،

اگر حاصيل اولا، عشق عالمينده بؤيله كام اولماز.

صفاي وصله يئتدين، ائيله‌ييب چوخ سعيلر، اي دل!

بيان ائت بير به بير هيجران غمين، بؤيله مقام اولماز.

وصال يارا يئتدين، بير اياق توت، باده قيل حاضير،

دور اي ساقي! باشينچون بؤيله دم هرگيز مدام اولماز.

بو بزم وصل جنّت، ساقيسي غيلمان طوبا قد،

مني منع ائتمه زاهيد! مئي بهشت ايچره حرام اولماز.

گؤزون منع ائتمگه مولك روخوندان لشكر خطي،

ائديب موژگانلارين صف- صف كي دعوا بي‌نيظام اولماز.

گداليق رسميني توت كيم، در جانانا يئتمكچون،

ظهوري، ننگ قيلما، عاشيق ايچون ننگ و نام اولماز.

 

 



[1] ديوان چاپ سنگي، ص 152.

[2] كؤچرلي، 95.

[3] همان يئر.

[4] ديوان اشعار تركي فضولي، تصحيح و تدوين حسين محمدزاده صديق، اختر، تبريز، 1384، ص 191.

[5] كؤچرلي، 92.

[6] تذكره‌دن نقل.

[7] كؤچرلي، 97.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی