تبلیغات اینترنتیclose
مطبوعات فعاليتي
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

موضوع : مطبوعات فعاليتي, | بازدید : 525

1. سيّد عظيم و مطبوعات

سيّد عظيم شيرواني اؤز زامانيندا نشر اولان مطبوعات اورقانلاري ايله سيخ علاقه‌ده اولموشدور. او جمله‌دن اكينچي، ضيا و كشكول آدلي مجله‌لرده بعضي شعرلريني نشر ائتديرميشدير.

بو نشريه‌لر آراسيندا اكينچي نشريه‌سيني داهادا چوخ سئويردي و اونون بانيسي و باش يازاري حسن بيگ زردابي (1837- 1907م.) ايله دوستلوق ائتميشدير. اكينچي‌دن علاوه، او ضيا و كشكول نشريه‌لرينده‌ده فعال اشتراك ائتميشدير.

2. حسن بيگ زردابي

حسن بيگ زردابي آذربايجان توركجه‌سي ايله ايلك مطبوعات اوراقنيني يارادا بيلميشدير. او 1875- نجي ايلده، يعني يوز اوتوز ايل بوندان قاباق اكينچي آديندا مجله‌نين نشرينه باشلاميشدير و آنا ديل مطبوعاتي‌نين اساسيني قويموشدور.

حسن بيگ ملك زاده زردابي، شمسي 1216 (1837 م.) ايلينده گؤي چاي ماحالي‌نين زرداب كندينده آنادان اولموش، درسلريني كند مكتبي، سونرا شاماخي‌دا رسمي مدرسه‌ده اوخوموش، تيفليس شهرينده ديپلم آلميش و 1240 ش. (1861 م.) ايلينده مسكو دانشگاهينا داخيل اولموش و دؤرد ايل سونرا رياضيات و طبيعيات علملريندن فارغ التحصيل اولموشدور.

سونرالار اؤز وطنينه قاييدان زردابي معلم‌ليك ايشي ايله مشغول اولموش و 1254 ش. (1875 م.) ايلينده غزئت نشر ائتمه اجازه‌سي آلميش و اكينچي‌نين نشرينه باشلاميشدير.  1256 ش. (1877 م.) ايلينده روس دؤلتي اونون دفتريني باغلاميش و اؤزونوده تبعيد ائتميشدير. او 1286 ش. (1907 م.) ايلينده فلج اولموش و وفات ائتميشدير.

3. اكينچي غزئتي‌نين بؤلوملري

اكينچي غزئتي‌نين يازيلاري بئش اساس بؤلومه بؤلونوردو:

  1. داخيله.
  2. اكين و زراعت خبرلري.
  3. مكتوبات.
  4. علمي خبرلر.
  5. تازه خبرلر.

 

1- نجي بؤلوم داخليه آدلانير و اصلينده سرمقاله حساب اولونوردو. 2- نجي بؤلوم يعني اكين و زراعت خبرلري غزئتين ان مهم بؤلومو ساييليردي. بورادا اكين، باغ، بستان، مالدارليق، قوشچولوق، آري‌چيليق و سائره موضوعلارا عائد علمي- كوتله‌وي مقاله‌لر درج اولونوردو كي چوخونو زردابي اؤزو يازيردي. 3- نجو بؤلومون اساس يازيچي‌سي حاج محمد صادق احسن القواعد ايدي. او بورادا تيفليسده چيخان ارمني غزئتيني تنقيد و نصيحت ائده‌رك يازيردي:

«بني آدم هامي قارداشدير. گره‌ك قارداشلار آراسيندا صلح وئرمك. فيكرين بو اولسون كي قارداشيميزين آراسيندا صلح وئره‌سن، نه اينكه بو قيسم مطاليبي غزئته يازاسان، قارداشلار آراسيندا عداوت دوشسون».[1]

 

همين بؤلومده مختليف يئرلردن گلن مقاله‌لر، شعرلر و يازيلار درج اولونوردو. سيّد عظيمين شعرلري‌ده ائله بو بؤلومده نشر ائديلميشدير. 4- نجو بؤلومده دونيادا باش وئرن علمي نائيليتلر حاققيندا دانيشيليردي. بورادا اونون اساس تخصصي اولان طبيعيات علملريندن بحث اولونوردو. ميثال ايچون بيرينجي نومره‌ده ائولري سئل باسماغي‌نين ضرري و 2- نجي نؤمره‌ده مئشه سالماقدان دانيشيلير عنواني ايله مقاله‌لر گئديبدير.

5- نجي بؤلومده قيسا خبرلر نشر اولوردو. ميثال ايچون 1- نجي نؤمرده 20 تزه خبر درج اولموشدور. اونلاردان ايكيسيني آشاغيدا اوخويورسونوز:

- بو ايل آوروپادا و آمريكادا بوغدا آز اولماق سببي ايله گره‌ك بيزيم بوغدا آرتيق قيمته گئتسين.

- ايتاليادان و فرنگستاندان خبر وار كي، بو ايل داغ و سرين اولان يئرلرده باراما چوخ اولوب، آمما اونلارين چوخو خراب اولدوغونا، اونلاردان ايپك آز چيخيب. بو سببه بو ايل ايپك، كئچن ايلدن آز اولاجاق.

 

4 . اكينچي‌ده سيّد عظيم

سيّد عظيم، ايكي هفته‌ليك اكينچي غزئتي‌نين 6- نجي نؤمره‌سيندن امكداشليغا باشلاميشدير. بورادا اونون آشاغيداكي غزلي، مكتوبات بؤلومونده نشر اولموشدور:

هزاران شوكر كيم بير شخص عالي قدر هيمّتدن،

غزئت بونيادينا روسيه‌ده اذن آلدي دؤولتدن.

ملك زاده حسن بيگ عارف دونياي زردابي،

گؤتوردو اهل اسلامي بوگون خاك مذلتدن.

زبان تورك ايله آگاه ائيله‌ر اهل قفقازي،

گهي تازه خبرلردن، گه آثار حؤكومتدن.

اولوب سوداگر خئير، اول مكرم اهل اسلاما،

خبردار ائيله‌دي هر نفع و هر كسب و تجارتدن‌.

نسيم صبح تك فئيضي اولوب بو عالمه ساري،

اوياتدي لوطف اليله غفلت اهلين خواب غفلتدن . . .

 

5. منظوم يازيشمالار (مكتوبات منظومه)

سيّد عظيم، اكينچي غزئتي يولو ايله خلقي علم و معارفه ساري يؤنلدير و اونلاري دونيانين يئني علملريني كسب ائتمگه تشويق ائديردي و شعر ديلي ايله اونلارلا دانيشيردي. زردابي‌يه يازديغي مكتوبلاري‌دا منظوم قلمه گتيريردي:

- 1 -

اي حسن بيگ، معلم دانا!

اي ائدن اهل عالمي احيا!

اي چاتان عالمه صفا سندن،

ائيله‌يير سيّد التجا سندن،

كيم بو مكتوبو كيم خياليمدير،

اهل قفقازا عرض حاليمدير،

ائده‌سن چاپ، اي گؤزوم نورو!

تا اولا روزگار مشهورو.

 

اونون زردابي‌يه گؤندرديگي منظوم مكتوبلار دالبادال اكينچي غزئتينده نشر اولوردو. بوردا همين يازيلاردان بعضي جزيي پارچالار نقل ائديريك:

داد و فرياد، اي گروه عظام!

اولدو ضايع بو ملّت اسلام.

 

گونو گوندن ذليل و خوار اولوروق،

مؤحنت قوصصه‌يه دوچار اولوروق.

بو قده‌ر درد كيم اولور حادث،

اونا بي‌علم‌ليك اولور باعيث.

بير بلادير بو درد ناداني،

كي اونون علم اولوبدو درماني . . .

ايندي ناخوشدو ملّت اسلام،

اونا لازيمدي ائيله‌مك انجام.

درديميزدير بو درد نادانليق،

كي توتوبدور بيزي پريشانليق . . .

 

ايها النّاس! كيميادير علم،

مظهر ذات كبريادير علم . . .

 

 

- 2 -

دو سؤال ائتدي بير نفر جاهيل،

كي غزئتدن نه‌دير بيزه حاصيل؟

بو حسن بيگ نه ايسته‌يير بيزدن،

دولدوروب عالمي قورو سؤزدن!

داد ائدير كي گره‌كدي علم اوخوماق،

چكمه تيكمك و يا كي بئز توخوماق.

دانيشير گاه اكين زراعتدن،

گاه ماشين گاه اؤزگه صنعتدن . . .

 

دئديم: اي جاهيل كريه خطاب!

گر چه نادانا يوخدو هيچ جواب،

لئيك واجيبدي شرح ائديم حالي،

سني في الجمله ائيله‌ييم حالي . . .

 

- 3 -

السّلام اي اهالي ذي شأن!

اي اولانلار بلا اوخونا نيشان!

نه بلا؟ جهل و درد نادانليق،

اي توتان جمعيني پريشانليق.

نئچه مدتدي كيم حسن بيگ زار،

حُسن تدبير ايله او فخر كبار،

اؤز قديمي ليسانيميزدا همان،

غزئته چاپيني ائديب عنوان.

اؤزونه گر چه يوخدو فائده‌سي،

لئيك‌ وار خلقه فئيض زائده‌سي . . .

اولوروق حال عالمه واقيف،

بو بيزه بس دگيلمي، اي عاريف! . . .

 

- 4 -

اي بيزه خئيرخواه اولان محسن،

اهل احسان و خوش نيشان محسن!

ملّتين غئيرتين چكن قارداش،

تخم خوشبخت‌ليگي اكن قارداش.

سؤزلرين دون گتيردي تورا مني،

شاد قيلسين گؤروم ايلاهي سني.

يازميش ايدين كي اي گروه بشر،

اهل اسلام و قوم پاك سير!

آييلين بيرجه خواب غفلتدن،

گئري قالديق تمام ملتدن.

آفرين، اي يگانه‌ي دوران!

پندينه يوخدو شك و ريب و گومان.

مثلين خوب، سؤزلرين مرغوب،

ذوق ائده‌ر گوش ائدنده اهل قلوب.

في الحقيقه درخت ناكاميل،

تربيت فئيضينه اولور شاميل.

نوع انسان دگيل آغاجدان كم،

قابل تربيتدي هر آدم . . .

 

 

6 .  ضيا نشريه‌سي

اكينچي باغلانديقدان سونرا، آنا ديليميزده ضيا آدلي نشريه نشر اولدو، سيّد عظيم بو نشريه‌ده‌ده اشتراك ائتميش‌دير. بو نشريه حاققيندا يازديغي شعردن بير نئچه بئيت گتيريريك:

ايلاهي! بو ضيا آفاق آرا گون تك ضيالانسين،

ضياء طلعتيندن ديده‌ي عالم جيلالانسين.

اونا باني اولان حاجي سعيدين كوكب بختي،

سعادت مطلعيندن ظاهير اولسون، انجلالانسين.

غزئت بير هدهد زيبا، غزئت خوانلار سولئيماندير،

يئتيب بلقيس معنايا، گره‌ك اونلار سبالانسين.

غزئتدير پيك روحاني، كي سؤيلر سيرر پنهاني،

نه لازيم پيك حق كونج خفادا اختفالانسين؟

. . .

ايلاهي سيّدين قيل بو دوعاسين سن اجابت كيم،

ضيا گون تك ضيالانسين، جهانا منجلالانسين.[2]

 

 همين نشريه‌ده اونون بير چوخ شعرلري چاپ اولموشدور.

 

 



[1] اكينچي، ش 22.

[2] ديوان، ج 2، ص 60.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی