تبلیغات اینترنتیclose
سيّد عظيم چاغي و چاغداشلاري- 1
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

موضوع : سيّد عظيم چاغي و چاغداشلاري, | بازدید : 600

سيّد عظيم شيرواني، بيت الصّفا عضولريندن علاوه، قاراباغ شاعيرلري خصوصيله عبدالله عاصي ( 1256/ 1291هـ ./ 1841-1874م.) دربندلي ميرزا محمد تقي قمري (1235- 1309هـ ./ 1819-1892م.)، نوخالي اسماعيل ناكام (1255- 1324هـ . / 1839-1906م.) تبريزلي محمد امين دلسوز، مجمع الشّعرا عضولريندن عبدالخالق يوسفي (1305-1344هـ . / 1849 / 1924م.) عصري‌نين بؤيوك شاعيرلري ميرزا نصرالله باهار شيرواني، آقا علي ناصح ايله دوستلوق ائديب و اونلارلا شعرله‌شير و يازيلاشيردي.

اصلينده اونون ياشاديغي چاغ يعني ناصرالدين شاه قاجار دؤورونو آذربايجان ادبيات تاريخي آراشديريچيلاري، سيّد عظيم چاغي آدلانديرميشلار. اونون اؤز زمانه‌سينده اولان تأثيري، شعريميزين انكشافي و يئني حال و هوا ايله دولماسينا سبب اولموشدور. نئجه كي فضولي شعر تاريخيميزده دؤنوش نؤقطه‌سي ساييلير، سيّد عظيم‌ده اونون كيمي شعر تاريخيميزين بير دؤنوش نوقطه‌سي حساب اولور.

ادبيات تاريخيميزده سيّد عظيم چاغي‌نين اؤزه‌لليك‌لريندن ان اؤنمليلريني بئله سايماق اولار:

  1. غزل ديلي‌نين ساده‌ليك و روانليغا ساري چكيلمه‌سي.
  2. شاعيرين اجتماعي و سياسي موضوعلارا ياناشماسي.
  3. قصيده‌لر و مثنويلرده خلقين حياتيندان و ياشاييشيندان جانلي تابلولارين وئريلمه‌سي.
  4. شعر ديلي‌نين خلقين ديلينه ياخينلاديلماسي و شعر ايله يازيشمالارين چوخالماسي.
  5. انتقادي شعرين كوتله‌ويلشمه‌سي و شعر وسيله‌سي ايله عئيبه‌جرليك‌لرين تنقيدي.

 بو چاغين آدليم شاعيرلريندن آشاغيدا آد آپاريريق:

1. باهار شيرواني

ابوالقاسيم اوغلو ميرزا نصرالله باهار شيرواني 1247 هـ . ايلينده شاماخي شهرينده دونيايا گلميش و 1300هـ . ايلينده مشهد شهرينده محمد تقي بهارين آتاسي ملك الشّعرا محمد كاظم صبوري ائوينده وفات ائتميشدير. تهراندا رضا قلي خان هدايت و اصفهاندا ايرج ميرزانين آتاسي غلامحسين ميرزا صدر الشّعرا و تبريزده اديب ناصر ايله يازيلاشاردي. ايرج ميرزا و محمد تقي بهار اونون شاگيردلري اولوبلار. محمد تقي بهار اؤز تخلّص و شعر قابليتي‌ني اوندان آلميشدير. اونون فارسجا ديواني، اؤلدوكدن سونرا صبوري‌نين ائوينده قالميش و محمد تقي بهار او ديوانين شعرلريني اؤز آدينا مشهور ائتميشدير.[1]

سيّد عظيم اؤز تذكره‌سينده اونو بئله آدلانديرير:

«استاد ماهر، حكيم باهر، اديب فاضل و كامل، افصح الشّعرا و املح الفصحا مولانا باهار»

و اوندان بير نئچه غزلي تذكره‌نين زينتي ايچون گتيرير.

فريدون كؤچرلي يازير:

«آذربايجان شاعيرلري تاريخينه آز- چوخ بلدياتي اولانلارا، باهارين نام محترمي و كلام دلپذيري معلوم اولماميش دگيل».[2]

باهار شيرواني تهرانا گليب و ناصرالدين شاه درباريندا ملك الشّعرا لقبي آلميشدير.

اونون توركجه‌ غزللري اويناق و آخيجي لهجه‌ليدير:

مئي نورو جيلوه ائيله‌دي جام بيلوردان،

جام بيلورو گؤر كي لبالبدي نوردان.

ناز ايله بير خوراما گل، امواتا قيل گذر،

تا مرحبا! سسي گله اهل قبوردان.

زاهيد سؤزيله كيم بوت مئيخانه‌دن كئچر؟

اؤزو گؤره‌ك كئچيرمي بهشت ايله حوردان؟

اول بي‌وفا توتارمي وفا ايله دستيمي؟

باسماز آياغيني گؤزومه چون غروردان.

مئيخانه‌يه باهار غرور ايله مئيل ائده‌ر،

زاهيد قصورا مئيل قيلارميش قصوردان!

 

فارسجا غزللريندن نمونه:

ريختي، بر هم زدي گيسوي عنبرفام را،

باز رسواي جهان كردي من بدنام را.

وعده دادي صبح بر وصلم، مگر دانسته‌اي،

هجر تو بر من برابر كرد صبح و شام را؟

گفتمش:«سيمين برت را خواهم اندر بر كشيد»،

گفت:« رو، از دل برون كن اين خيال خام را!»!

گر به صورت بر تو ماند صورت بت‌هاي چين،

واجب آمد سجده كردن بعد از اين، اصنام را.

هندوي زلفت اگر زين گونه قصد دين كند،

سجده‌گاه كفر سازد قبله‌ي اسلام را.

چون كني بر مستحقان بخش، نعمت‌هاي حسن،

بر بهار خسته دل اوّل بده دشنام را!

 

باهار شيرواني‌نين توركجه ديوان، تحفة العراقين و نرگس و گول آدلي مثنوي‌لريندن باشقا، فارسجا كلياتي‌دا واردير.

سيّد عظيم اؤزونو باهارين شاگيردي حساب ائده‌رك دئيير:

من اؤزوم كيم زمانه سروري‌يم،

اهل ذؤوقون كمينه چاكري‌يم.

حاجي سيّد عظيمدير آديم،

شعرده روح قدس اوستاديم.

اوستاديم باهارِ وحيْ كلام،

كي اونون نظمي‌دير ملوك كلام.[3]

 

2. علي اصغر نورس

ميرزا علي اصغر نورس (1252- 1330 هـ . ) قاراباغين شوشا شهرينده آنادان اولموش مجليس خاموشان و محفيل انس ادبي محفيللري‌نين فعال عضوو ايدي. فضولي‌نين شعرلرينه  نظيره‌لر يازان نورس، قاراباغي تخلص ائديردي. سيّد عظيمين اونا خيطاب بير نئچه شعري واردير. او جومله‌دن:

نورس! اي همدم بي‌مهر و شه سنگين دل!

كي پري‌وار بوگون منزيل اولوب شوشا سنا!

 

سنسن اول قصر مشيّد كه ره رفعتدن،

يئتمز اي پاك گوهر! سلّم انديشه سنا.

چرخ مينايي سنا ائيله‌دي ساغر قمرين،

گؤردو تا شوشادا واردير هوه‌س شيشه سنا.

سنسن اول نخل هنرپرور باغ معني،

كي اولوب دانش و فرهنگ و خرد ريشه سنا.

دون ائشيتديم كريمخان فلك چاكردن،

تاپيليب عالم امكاندا بير پيشه سنا:

قوّه‌ي طبعده سن شير نئيستان سخن،

باعيث اولدور كي بوگون قيسمت اولوب بيشه سنا.

سيّدا شيشه طرف سنگ ملامت آتما،

تا كي اوستاد هونر وورميا بير تيشه سنا!

 

3. عاصي قاراباغي

عبد الله اوغلو علي بيگ عاصي قاراباغي (1256-1291هـ ./ 1841-1874 م.) تانينميش طنز شاعيريميز قاسم‌بيگ ذاكرين نعره‌سي ايدي. اؤز عصري‌نين حؤرمت قازانان شاعيرلريندندير. امير عليشير نوايينين ديوانين ياخشي اوخويا بيلن و اونا بنزه‌تمه ديوان يارادان بير عاليم شاعر ايدي. ملا بيخودا يازديغي منظوم مكتوب معروفدور.[4]

سيّد عظيم اؤز تذكره‌سينده عاصي‌دن بير تركيب بند نقل ائدير كي بئله باشلايير:

ساقيا! اي بوت مه‌پيكر و خورشيد جمال،

اله آل باده‌ي گولگون قدحين مالامال . . .[5]

 

تذكره‌ي نواب صاحيبي اونون ديوانين 14000 بئيت يازميشدير. بير فارس شاعيري اؤلومو حاققيندا دئميشدير:

از بهر سال رحلتش آمد ندا ز غيب:

روحش به قصرهاي جنان كرد جايگاه. (= 1291)

4. علي حيدر فروغي

علي حيدر بن خداوئردي فروغي سيّد عظيمين ان ياخين دوستلاريندان ايدي. او، اؤز تذكره‌سينده اونون حاققيندا دئيير:

«كرات و مرات مجليس شعرادا شعرلري تقرير اولوب، مورد تحسين اولموشدور. بو بنده ايله كمال صداقتلري واردير. همين ايل كي 1291- نجي سنهد‌ير، اوائل رجبده، قلعه‌ي شوره‌ده ملاقاتلاري اتفاق دوشوب، ديوان شعرلري ملحوظه نظر اولدوقدا ملاحيظه اولوندو كي، قابليت زياده پئيدا ائديبدير».[6]

و سونرا اوندان بير نئچه بئيت نقل ائدير:

يارب! اولومو هيجرين اليندن قوارام من؟

بو غوربت ائليندن وطنيم ساري وارام من؟

 

5. محمد تقي قمري

ابراهيم اوغلو ميرزا محمد تقي قمري (1235- 1309 هـ .) نين ان مهم اثري اولان كنزالمصائب دفعه‌لر تبريز و تهراندا چاپ اولوبدور. اونون مرثيه‌لري چوخ گوجلودور. توركجه‌ميزه بو كيتابدان باشقا كنز المعارف آدلي بير اثرده باغيشلاميشدير كي اينديه قده‌ر چاپ اولماميشدير. اونون عقل و عشق مثنويسي عرفاني ادبياتيميزين پارلاق قاشداشي كيمي دفعه‌لر نشر اولوبدور.

سيّد عظيم اونون همين مثنويسيندن آشاغيداكي بئيتلري تذكره‌سينه داخيل ائتميشدير:

بو سئودادان كئچ، اي غافيل! داهي عؤمر جاوان كئچدي،

شباب ايامي گئتدي، ذؤوق سئوداي جهان كئچدي.

سراي عاريتده هر گلن بئش گون قالير مهمان،

رفيق و آشينا گئتدي، تماماً همزبان كئچدي.

بيلير بير گون دئيه‌ر قدرين بيلنلر «حئيف!» دونيادا،

قويوب نظم دُر افشان، قمري‌يِ شيرين زبان كئچدي.

 

قمري ايله سيّد عظيم آراسيندا هجويه‌لرده ردّ و بدل اولموشدور. سيّد عظيم بو حاقدا يازير:

 

«بير قصيده باب الابواب دربنددن يازيب شعراي اربعه‌ي شيروانا روانه ائتميشدير. همين قصيده‌ده مولانا جناب غافيل، بيخود، ضويي و بنده‌ي حقيري هجو ائتميشدي».[7]

6 . ناجي

سيّد عظيم و باهار شيرواني‌نين دوستلاريندان اولان (1240هـ ./ 1824 م.) ايلده شاماخي شهرينده دونيايا گلن ملاقدير ناجي شيرواني او چاغ شعريميزين انكشافيندا تأثير قويان آدليم شاعيردير. او، فضولي‌نين و سيّد عظيمين شعرلرينه بنزه‌ر اثرلر يازميشدير. سيّد عظيمين آشاغيداكي:

نشيمنين كي سنين بوريادير، اي واعيظ!

قسم او خاليقه كيم بو، ريادير، اي واعيظ!

 

مطلعلي غزلينه آشاغيداكي بنزه‌تمه‌ني يازميشدير:

هميشه ايش سنه وعظ خدادير، اي واعيظ!

قسم او وعظينه كيم بو، ريادير، اي واعيظ!

او ناسا كيم بويورورسان خطادان استغفار،

او سنده اولماسا، امرين خطادير، اي واعيظ!

گؤره‌ر جهنّمي هر كس كي گلسه مجليسينه،

دمين خلاييقه دوزخ‌نومادير، اي واعيظ!

كلام ايزدي دئرسن كي مال ائديم حاصيل،

دگيل بو موعيظه، بيع و شرادير، اي واعيظ!

زكاتا كيم فقرا ماليدير، تيكيرسن گؤز،

بو هانسي مذهب و دينده روادير، اي واعيظ!

بويورما ناجي‌يه تؤوبه شرابدان،‌كرم ائت،

كيم اول ريا مرضيمچون دوادير، اي واعيظ!

 

اونون يازديغي پئيغمبر نعتي‌ده يئنه سيّد عظيمدن استقبال اولونموشدور:

اي پاك وجودون سبب خلقت افلاك!

بو قؤولده بسدير منه شاهيد ايكي لَولاك.

 

وئرميش سنه ايزد او قده‌ر روتبه‌ي اعلا،

يوز ايل اوچا، يئتمر او يئره طاير ادراك.

خاك أوزره كي قويدون قدمين،‌ اولدو مشرّف،

اولموش سنه شاهان جهان بسته‌ي فتراك.

گولزار ملاحتده قدين سرو، لبين گول،

يانيندا گول و سرو، ميثال خس و خاشاك.

گر روز اجل يئتسه منه موژده‌ي وصلين،

اول موژده‌يه يوز جان وئره‌رم شاد و فرحناك.

قيل عفو، درينده نه كي ترك ادب ائتميش،

ناجي كيمي يوخ دهرده ديوانه‌ي بي‌باك!

 

ملاقدير ناجي‌نين ديواني اينديه قده‌ر نشر اولماميشدير. اونو شعرلري‌نين بعضيلري، تذكره‌لر و مفتي افندي‌نين ترتيب ائتديگي مجموعه‌يه داخيل ائديلميشدير.

 

7. سيّد ابوالقاسيم نباتي

سيّد ابوالقاسيم نباتي، (1215-1262هـ ./ 1800- 1852م.) سيّد عظيمين چوخ سئوديگي و اونا درين حؤرمت بسله‌ديگي بير شاعيردير. تذكره‌سينده اونو احترام ايله ياد ائدير و دفعه‌لر شاعيرلرين اوندان اقتباس ائتمه‌لرينه تأكيد ائدير.

اونون آدي ادبيات تاريخيميزده فضولي ايله يان- يانا چكيلير، رسمي كلاسيك ادبياتيميزدا اونون كيمي أوركلره نفوذ ائدن و شعرلري خلق ديلي‌نين ازبري اولان شاعير آز تاپماق اولار. نباتي اؤز ياشاديغي ايللرده، ايران- روس قانلي ساواشلارين دا گؤرموشدو. شعرلرينده ايسه آذربايجاندا أوز وئرن ساواش فاجيعه‌سيندن آجي تأثيرلر آلميشدير:

سنه درد هيجري يكسر ائده‌رم حكايت، آمما،

قلم الده ‌سيز سيزيلدار كي بو سؤز بيانا گلمز!

سارا بس ‌هايانه گئتدي، هاني قيشقيريق صداسي،

نه گليب او خان چوبانـا كي بوقيش موغانا گلمز؟

 

نباتي خلاقيتي اوندان سونرا بوتون شاعيرلريميزين ياراديجيليغيندا اثر بوراخميشدير. سيّد عظيم، راجي، صراف، شكوهي، لعلي، صابر، حداد، محمد باقر خلخالي و محمد علي هيدجي هاميسي اوندان ايلهام آلميش و شعرلرينه نظيره‌لر يازميشديرلار. بونون خصوصي تدقيقاتا احتياجي واردير.

يوخاريدادا دئديگيميز كيمي، اونون خلاقيّتي‌نين أن مهم نقطه‌سي باطني حالتلريدير. او بو حالتلرده اؤزون ايلاهي بير تجسّدده و اناالحق دئين گؤرور:

نه دئييرسن يئنه اي زاهيد افسرده مزاج،

كل عالم‌ده بيلير طاليب معنايام من!

معجزات هامي پيغمبر اولوب منده عيان،

بيلمك اولماز مني، بير سيرّ هويدايام من.

حله گؤر بسدي نباتي نه اناالحق‌دير بو،

داهي بير يول دة گيلن واحيد يكتايم من![8]



[1] عبرت نائيني مدينة الادب تذكره‌سينده يازير:«اكثر اشعار محمد تقي بهار كه از سبك او بيرون است و به خود مي‌بندد، از بهار شيرواني است. (پروفسور حميد محمدزاده‌دن نقل اولدو. باخf آذرتورك نشريه‌سي ش 1، ص 96)

[2] كؤچرلي، ص 5.

[3] تذكره، ص 23.

[4] بو مكتوب ايچون باخ: رياض العاشقين، ص 132.

[5] تذكره، ص 144.

[6] تذكره، ص 151.

[7] تذكره، ص 159.

[8] باخ f ديوان اشعار تركي سيّد ابوالقاسم نباتي، تصحيح و تدوين حسين محمدزاده صديق، اختر، تبريز، 1385.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی