تبلیغات اینترنتیclose
سيّد عظيم چاغي و چاغداشلاري- 2
سید عظیم شیروانی در پژوهشهای دکترحسین محمدزاده صدیق
شرح افکار، احوال و آثار سید عظیم شیروانی بر اساس تحقیقات استاد دکتر حسین محمدزاده صدیق

 

مطالب مربوط به شناختنامه سید عظیم شیروانی به آدرس زیر انتقال یافته است لطفا بر روی آدرس زیر کلیک فرمایید:

http://seyedazim.blogfa.com

 شناختنامه سید عظیم شیروانی، نقاش: ناصر بخشی هنرمند تبریزی

پرتره سید عظیم شیروانی

نقاش: ناصر بخشی، هنرمند تبریزی

دانلود پرتره سید عظیم در اندازه بزرگ، اینجا کلیک کنید

موضوع : سيّد عظيم چاغي و چاغداشلاري, | بازدید : 603

8 .  فاني تبريزي

ميرزا صادق فاني تبريزي هيجري 1255- نجي ايل تبريزده آنادان اولموشدور. اوليه علملري اؤز آتاسي ملا اسدالله يانيندا تحصيل ائتميشدير، سونرا گنجه شهرينه گئديب اورادا مكتبدارليق ايشي ايله مشغول اولموشدور.

كؤچرلي يازير:

« . . . قوّه‌ي شعريه‌سي فوق العاده‌دير. فاني‌نين يازديغي شعرلر علي العموم تربيه‌يه و حكمته عائددير. ديواني‌وار، لاكين چاپ اولماييبدير. همان ديوان، ديوان فاني آدلانير. فاني‌نين گؤزل حسن خطّي وار . . . مكتب شاگيردلري ايچون خمسه‌ي ادبيه آدلي بير مجموعه ترتيب قيليبدير. بو مجموعه بئش جزءدن عيبارتدير:

  1. 1.     لازيملار
  2. 2.     ادبيه
  3. 3.     تمثيلات
  4. 4.     اقباليه و ادباريه
  5. 5.     اخلاقيه

. . . بوندان علاوه فاني‌نين عقل، بخت و دولت عنوانلي منظوم بير اثري‌ده وار. مذكور اثرده بو أوچ شئيين هانسي بيريسي‌نين غئيرلرينه ترجيحي‌وار ايسه، معلوم اولور».[1]

فاني تبريزي هيجري 1325- نجي ايلدن سونرا وفات ائتميشدير. اونون شعرلري سيّد عظيمين شعرلري ايله بيرگه سسله‌نير:

جانا! سنه بو يازديغيم اسرار نهاندير،

هر فردي اؤز احواليما بير كشف بياندير.

اُنس آتشي جان اولدوغونو من‌ده‌ بيليرديم،

آتش زنه و جنگ همان انس جهاندير.

9. راجي تبريزي

سيّد عظيم او زامانكي تبريز ادبي اجتماعيتي ايله مؤحكم علاقه ساخلاييردي و تبريزلي عاليم و شاعيرلردن چوخ شئيلر اؤيره‌نيردي. اونلارين آراسيندان حاج ميرزا ابوالحسن راجي‌يه (1247هـ ./1831م.- 1292 هـ ./1875 م.) داها زياده حؤرمت بسله‌ييردي. اؤز تذكره‌سينده اونا گئنيش يئر وئرميش و ايگيرمي‌يه ياخين غزل و باشقا شعرلريني اورايا داخيل ائتميشدير. او، راجي حاققيندا يازير:

« . . . تولّد شريفلري 1250- نجي سنه‌ده دارالسلطنه‌ي تبريزده، عصر محمد شاه قاجاردا واقع اولوب. الآن اشعار شورانگيزلري السنه و افواهدا مذكوردور و شيرين كلامليقلا مشهور. او بزرگوار كربلاي معلّايا مشرف اولموشدور. تاريخ هيجرتين 1292- نجي ايلي‌نين اواخرينده شاهزاده‌ي اعظم فرهاد ميرزا بيت الله الحراما عازم اولان ايلي مكه‌ي معظمه‌يه مشرف اولموشدور. اتمام اعمالدان سونرا، جناب فرهاد ميرزا تابعلري ايله جدّه يولوندان واپور ايله استانبول يولو ايله مراجعت ائديرلر. آمما جناب حاج ابوالحسن جدّه‌دن راكب سفينه‌ي آتشي اولوب، درياي شبدن روانه‌ي عتبات عاليات ايكن، تلاطم طوفاندان سفينه‌لري شيكست اولوب، اول گوهر قلزم ادب و اول آفتاب برج حسب، درياي شبده احبابلاري ايله، محرم آيي‌نين اونو، 1293- نجو سنه‌ده غرق اولدولار. بو همان ايل، او جنابين اشعار فارسي و توركي و مرثيه‌لرين احبابلاري تبرّكاً طبع خانه‌ي تبريزده مطبوع ائديبلر».[2]

راجي‌‌نين بو حزن آور اؤلومو تبريزده چوخ آجي قارشيلانميشدير. اونون حاققيندا سوزناك مرثيه‌لر يازيلميشدير. او جومله‌دن صبور تبريزي دئيير:

اي دريغا كه حضرت راجي،

چون زر از كيسه‌ي احبّا رفت.

بي‌حد افسوس، صدهزار دريغ،

كه به حسرت ز دار دنيا رفت . . .

 

فريدون كؤچرلي راجي‌نين اوتايدا شؤهرتينه اشاره ائده‌رك يازير:

«راجي‌نين ديوان اشعاري آذربايجانين هر بير ولايتينده داغيليب و كلام موزونو ديللرده جاريدير».

اونون آشاغيداكي غزلي ديللر از بري‌دير:

نه عشق اولايدي، نه عاشيق، نه حوسن دلبر اولايدي،

نه آينه، نه صفا، نه كؤنول! نه جوهر اولايدي . . .

 

ميرزا ابوالحسن راجي، سيّد عظيم چاغي شعريميزين همده تجنيس اوستاديدير.

 

10. دلسوز تبريزي

محمد امين دلسوز تبريزي‌نين بير چوخ اجتماعي مضمونلو شعرلريني سيّد عظيم استقبال ائتميشدير. ميثال ايچون سيّد عظيم بير يئرده بوغدادان ظريفانه شيكايت ائديب، اونون سوراغينا دوشور و محمود آقانين آنباريندا اونو تاپير و دئيير:

صاحيبا! محمود آقا، لوطف و مروّت دميدير،

ائيله‌ييب سيّد مسكينه خيانت بوغدا.

ايندي بئش آيدي كي مندن قاچيب اول روي سياه،

قويوب آواره من زاري، بو نكبت بوغدا.

توتموشام ايندي سوراغين، سيزين آنباردادير،

قورخورام كي قاچا اوردان داهي خلوت، بوغدا . . .

 

اوندان قاباق، دلسوز ايسه بوغدانين سوراغينا كنده گئدير، بوغدا قاچيب آنبارلاردا گيزله‌نير، شه‌هره گلير، تيكيلي چوواللاردا آغزي باغلي گؤرور و شيخ الاسلامه خيطاب ائده‌رك دئيير:

نئچه مدّتدي اليمدن قاچيب اول ظاليم دون،

توتموشام ايندي سوراغين، سيزين آنباردادير.

التماسيم بودو سندن: توتوب اول سنگدلي،

وئره‌سن بنده‌يه، چون قصد دل زاردادير.

آپاريم من ده دگيرمانا اونون باشين ازيم،

دؤنمه‌ييب تا كي دگيرمان نه قده‌ر كاردادير . . .

 

بو ايكي قطعه‌نين مقايسه‌سي گؤسترير كي سيّد عظيم، دلسوز تبريزي شعري‌نين بير چوخ مضمونلاريني ايشلتميشدير. دلسوزون ديواني چاپ اولدوقدان سونرا، سيّد عظيم ياراديجيليغيندا هر طرفلي تطبيقي آراشديرمالار آپارماق اولار. دلسوز تبريزي‌نين ديوانيندان علاوه، حديث مرد قصاب آدلي بير منظوم حكايه‌سي وار، بئله باشلايير:

ابتداي سخن به نام خدا،

خالق كائنات و ارض و سما.

قادر ذوالجلال و فرد وحيد،

واحد و لاشريك و بي‌همتا.

ساخلايان بي‌ستون نه افلاك،

خالق آب و نار و خاك و هوا.

گاه عيان ائيله‌ين زمستاني،

گاه فصل بهار ائدن انشاء.

گاه سالان دشته مسند كافور،

گاه تؤكن بحره لؤلؤ و لالا.

شكري نئي‌دن ائيله‌ين جاري،

سنگدن آب و آبدن خارا . . .

 

11. اسماعيل ناكام

اسماعيل ناكام (1255-1324 هـ ./ 1839- 1906 م.) سيّد عظيم چاغي‌نين چوخ تأليفلي و ان آدليم شاعيرلريندن اولموشدور. ديوان بديع آدلي اثريندن باشقا، آشاغيداكي كيتابلاري‌دا تصنيف ائتميشدير:

1-     فرهاد و شيرين. 2- ليلي و مجنون. 3- شيخ صنعان. 4- خيالات پريشان.

منظوم اثرلردير:

1- لطيفه نامه. 2- دؤرد افندي. 3- گنج ادب (36 مقاله).

نثر اولاراق ترتيب ائديلميشدير.

اونون ديوانيندا ترنّم اولان عشق، فضولي و سيّد عظيمده اولدوغو كيمي، حقيقي عشقدير:

عشق او دگيلدير كيم اولوب بوت پرست،

دائيم اولوب جام غرور ايله مست.

ائتمه‌يه‌سن فهم كي دونيا نه‌دير،

بيلميه‌سن عالم عقبا نه‌دير.

يئنه خطادا اولاسان هرزه رو،

مئيكده‌لرده اولا باشين گيرو.

عشق اودور كيم ادب‌آموز اولا،

عاقبتي خوررم و فيروز اولا.

اولسا اگر عشق حقيقت نوما،

عاشيق اولار پيرو اهل وفا.

عاشيق اولان خاك طبيعت اولور،

واقيف اسرار حقيقت اولور . . .

 

سيّد عظيم اسماعيل ناكامين ياراديجيليغينا مفتون ايدي. اونون بعضي شعرلرينه نظيره و استقباليه يازميشدير. بير غزلده دئيير:

سيّدا ائيله شكي مولكونه البته روان،

بو غزل، گر چه دگيل گفته‌ي ناكاما جواب.

 

12. محمد آقا جرمي

سيّد عظيم چاغي باكي شهرينده قورولان مجمع الشعرانين رئيسي محمد آقا جرمي، سيّد عظيم ايله چوخ ياخيندان علاقه ساخلاييردي. سيّد عظيمين ديوانيندا محمد آقا جرمي‌يه خيطاب 50 بئيتليك بير قصيده واردير. بو قصيده‌نين نئچه بئيتيني نقل ائديريك:

يئتدي نامه‌دن منه اي تازه سخندان، جرمي،

گولشن شعره اولان بولبول خوشخوان، جرمي.

دئيه‌سن پيرهن يوسيف ايدي اول نامه،

گؤزومه وئردي ضيا اول مه تابان، جرمي.

هدهد با دصبا شهر سبا ايچره يئنه،

بئله سانديم گتيريب حؤكم سولئيمان، جرمي.

بئله فيكر ائتميش ايديم باكيدا اولماز شاعير،

نه بيليم من كي ياتيب بيشه‌ده اصلان جرمي!

آفرينلر سنه اي شاعير اعجاز كلام،

مرحبالار سنه اي ثاني حسان، جرمي.

. . .

 

سيّدم گرچه، بو سيّدليگه يوخدور فخريم،

شرط عصمتدير اولا طاعت يزدان جرمي.

كول منيم باشيما كيم بونجا خطالارلا يئنه،

وار اوميديم كي اولام داخيل رضوان جرمي.

 

سيّد عظيم اؤز غزللري آراسيندا جرمي‌نين بير نئچه غزليندن استقبال ائديبدير. او جمله دن:

اول سركشيده قد كيمي آز سرو ناز اولور،

سؤز راست خوشدو، وصفيني قيلسام  دراز اولور.

 

مطلعلي غزلين سونوندا دئيير:

عن قصد، جرمي‌يه ائله‌ديم عجز و انكسار،

مشهوردور كپكله كؤپك كؤنلو شاد اولور.

جرمي‌له چوخدو بو غزلين فرقي سيّدا،

گر سيم شعره بير محك امتياز اولور.

 

13. شاگيردلري و پيرولري

سيّد عظيمدن سونرا گلن و آذربايجان توركجه‌سي ايله غزل يازان ائله بير شاعير تاپماق اولماز كي، سيّد عظيمي اؤزونه اوستاد حساب ائتمه‌سين. اوندان سونرا گلن هر بير شاعير، اونا حؤرمتله باخيب، اثرلريني دؤنه- دؤنه اوخويوب و اؤزو ايچون ايلهام قايناغي ائتميشدير. سيّد عظيمين تأثيري او قده‌ر گوجلو و گئنيش، حؤرمتي ايسه او قده‌ر قاباريق و زياده‌دير كي اونون پيرولري و شاگيردلري حاققيندا چوخ حجملي بير كيتاب يازماق اولار.

بورادا قيساجا قئيد ائديم كي اونون مستقيم شاگيردلريندن بيريسي ميرزا علي اكبر صابر طاهرزاده (هوپ هوپ) و غير مستقيم اؤيره‌ننلريندن بيريسي سيّد محمد حسين بهجت تبريزي (شهريار) دير.

شهريارين ايستر فارسجا و ايسترسه توركجه غزللري‌نين حال و هواسيندا سيّد عظيمين روحو دويولور. ديل اونون ديلي، بيان اونون بياني و معنادا اونون معناسيدير. شهريار، سيّد عظيمين بير چوخ غزللريني اقتباس و يا استقبال ائتميشدير. ميثال ايچون سيّد عظيم دئيير:

خلقين ايمانيني گر مكر ايله شئيطان آپارير،

اول پري چهره نه‌دندير كي بس ايمان آپارير؟

 

شهريار ايسه غزليني بئله باشلايير:

آمان آللاه يئنه شئيطان گليب ايمان آيارا،

قورويون قويمايين ايمانيزي شئيطان آپارا.

 

شئيطان توكه‌ديب ايمانيزي جان آلير ايندي،

آللاهدان آلان جانيزي، شئيطان آلير ايندي![3]

 

 

او، حتي سيّد عظيمدن بير چوخ عيباره، كلمه و مصراعلار آليب، اؤز ديوانينا داخيل ائديبدير. ميثال ايچون سيّد عظيم دئيير:

مجنون ايله بير مكتب عشق ايچره اوخوردوم،

من ختم كلام ائتديم، او واللَيل‌ده قالدي.

 

و شهريار بو بئيتين دواميندا دئيير:

بيرگون‌ده ائشيتديك كي دوشوب چؤللره مجنون،

والليل اولوب وردي، جوانكن‌ده قوجالدي.

بيرگون‌ده خبر گلدي كي والليل‌سي ايله،

جان وئردي، جاهان ايچره يامان ولوله سالدي.

 

هر دلشده بير مئيلده قالدي ناقيص،

مجنون هوه‌سي لئيلي‌ده قالدي ناقيص.

من مكتب غمده ختم قرآن ائتديم،

اول كئچمه‌دي واللَيل‌ده قالدي ناقيص.

 



[1] كؤچرلي، ص 193.

[2] تذكره، ص 181.

[3] ديوان شهريار، كنگره بزرگداشت شهريار، ج 4، ص 226.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید عظیم شیروانی از دیدگاه دکتر حسین محمدزاده صدیق, شناختنامه سید عظیم شیروانی بر اساس پژوهشهای دکتر حسین محمدزاده صدیق,سید عظیم شیروانی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید عظیم شیروانی,تحقیقات دکتر حسین محمدزاده صدیق درباره سید عظیم شیروانی, سید عظیم شیروانی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره سید عظیم شیروانی,
ارسال در تاريخ جمعه 7 مهر 1391 توسط دکترصدیق. ارسال: سید احسان شکرخدایی